Tags-Gham

ġham-e-furqat kā dil ko bojh karnā ho agar halkā
sunāne ko tire qisse ye hamdam DhūñD letā hai

judā.ī kab rahī mumkin kisī hālat koī sūrat
mujhe mahfil ho tanhā.ī tirā ġham DhūñD letā hai

ḳhayāl-e-yār hī darmāñ ġham-e-furqat ke zaḳhmoñ kā
ki biite saath lamhoñ se ye marham DhūñD letā hai

us vafā-dushman se chhuT jaane ke ba.ad
ḳhud ko pā lene kā kitnā ġham rahā

maiñ tark-e-ta.alluq pe bhī āmāda huuñ lekin
tū bhī to mirā qarz-e-ġham-e-hijr adā kar

majlis meñ ġham kī ai 'sirāj' ab vaqt aayā daur kā
gar ḳhūn-e-dil maujūd hai mai-nosh ho mai-nosh ho

masarrateñ rāzdār-e-ġham thiiñ masarratoñ meñ alam thā pinhāñ
jabhī to sehn-e-chaman meñ shāyad bahār aa.ī ḳhizāñ se pahle

ishq hī vaj.h-e-mushkilāt nahīñ
yuuñ bhī ġham se kahīñ najāt nahīñ

ġham ne karvaT kabhī badlī thī magar aaj talak
dil ke āġhosh meñ kāñTe se chubhe jaate haiñ

jazba-e-ġham kī ḳhair ho 'sāġhar'
hasratoñ par nikhār dekhā hai

ḳhushī ki chehre pe ġham kā jalāl saath liye
hayāt miltī hai par intiqāl saath liye

pilā do zahr-e-ġham dil ko na chhoḌe gar havas-kārī
gunah vo ek achchhā jo bachā le sau gunāhoñ se

zarūratoñ ne satāyā hai is qadar mujh ko
ġham-e-ma.āsh ne ghar se nikāl rakkhā hai

sar-e-tūfān-e-ġham aksar sahārā DhūñD lete haiñ
udāsī ke samundar meñ kināra DhūñD lete haiñ

badal Daale haiñ kitne ghar ḳhushī ke vāste ham ne
magar ye ġham hamesha ghar hamārā DhūñDh lete haiñ

itnā to huā aah shab-e-ġham ke asar se
fitrat kā jigar phuuT bahā chashm-e-sahar se

hamārī us se jo sūrat huī safā.ī kī
hujūm-e-ġham ne adū par baḌī chaḌhā.ī kī

nikal aate haiñ aañsū hañste hañste
ye kis ġham kī kasak hai har ḳhushī meñ

kuchh aur kahāñ chāhiye is dil ko ki ab hai
dariyā-e-ġham-e-ishq kā pairāk nazar meñ

vo tire husn kā jaadū ho ki merā ġham-e-dil
har musāfir ko kisī ghaaT utar jaanā hai