Tags-Gham

hai dil-gudāz yuuñ bhī mirī dāstān-e-ġham
tāsīr us pe kuchh mire tarz-e-bayāñ kī hai

sitam kiye haiñ bahut dil pe ye haqīqat hai
ayaañ na kar ke vafūr-e-ġham-e-nihāñ ham ne

zabāñ ko hukm hī kahāñ ki dāstān-e-ġham kaheñ
adā adā se tum kaho nazar nazar se ham kaheñ

ġham-e-zamāna kī saḳhtiyoñ se huī hai pāmāl tab-e-'aḳhtar'
na vo nishāt-e-kuhan hai baaqī na vo mazāq-e-suḳhan hai baaqī

ġham to ye bhī hai ki taqdīr bhī roī barsoñ
haa.e vo zulf-e-girah-gīr bhī roī barsoñ

hameñ bhī ġham-talabī kā nahīñ rahā yaarā
tire bhī rañg nahīñ gardish-e-zamāna vo

har ghaḌī ek judā ġham hai judā.ī us kī
ġham kī mī.ād bhī vo le gayā jaate jaate

vasl meñ bhī rahā firāq kā ġham
shaam hī se sahar kā khaTkā thā

tavakkul be-niyāzī saath hoñ to
ġham-e-dīvār-o-dar dīvāngī hai

hai faqat parhez ye kah do marīz-e-ishq se
piine ko ḳhūn-e-jigar hai ġham hai khāne ke liye

peT ke ġham ne kiyā hai sab jahāñ ko muntashir
baap se beTā judā hai āb-o-dāne ke liye

muñh na dekhā aish kā tadbīr ham ne laakh kī
ġham ghaTāne ke liye farhat baḌhāne ke liye

tujh se hī chhupā.ūñgā ġham apnā
tujh se hī kahūñgā gar kahūñgā

zamāna-e-ġham-e-furqat basar nahīñ aatā
ajal bhī aatī nahīñ yaar agar nahīñ aatā

ġham-e-firāq meñ mar mar ke roz jiitā huuñ
vo kaun shab hai jo muñh tak jigar nahīñ aatā

ġham ke sāmān kuchh ziyāda haiñ
is mutābiq makān kuchh kam hai

bechain karvaToñ se ye zāhir hai saaf saaf
pinhāñ hī dil meñ hai ġham-e-pinhāñ liye hue

mutma.in dil hai ajab bhiiḌ se ġham-ḳhvāroñ kī
silsila tuul pakaḌ le na ye bīmārī kā

maiñ iqtibās-e-aziyyat huuñ lauh-e-duniyā par
so mujh meñ ġham ke sivā aur kyā dikhā.ī

yahī be-laus mohabbat yahī ġham-ḳhvāri-e-ḳhalq
aur merāj kise kahte haiñ insānoñ kī