Tags-Gham

ai mire zaḳhm-e-dil-navāz ġham ko ḳhushī banā.e jā
ā.ankhoñ se ḳhuuñ bahā.e jā hoñToñ se muskurā.e jā

'ārzū' us se kah do saaf ġham kā asar hai der-pā
jald hañsī na aa.egī aur abhī gudgudā.e jā

maanā ki dil ko tere na milne kā ġham rahā
sad shukr bach ga.e talab-e-mā-sivā se ham

hameñ ye dukh nahīñ hai ḳhud ko khoyā
ye ġham hai ham use bhī kho chuke haiñ

but-ḳhāne se dil apne uThā.e na ga.e
ka.abe kī taraf mizāj laa.e na ga.e

jaane kyuuñ log ġham se Darte haiñ
ham to ālām meñ nikharte haiñ

ġham bhī rakhte haiñ saath ḳhushiyoñ ke
zindagī meñ jo rañg bharte haiñ

maiñ dil meñ talḳhī-e-zahrāb-e-ġham bhī rakhtā huuñ
na misl-e-shahd huuñ shīrīñ na maiñ shakar kī tarah

yuuñ to kahne ko bahut raah meñ ġham-ḳhvār mile
ziist ke moḌ pe āzār hī āzār mile

ashk-e-ġham roke raheñ fāqa-guzāroñ se kaho
paanī gulḳhan se chalā nuuh ke tūfāñ ke liye

dar jahān-e-gul-e-be-ḳhār nachīdast kase
ġham na kar 'mānī'-e-nashtar-kash-e-daurāñ ke liye

dil nazar ban jā.egā ġham har ḳhushī ho jā.egī
aap ke jaate hī duniyā dūsrī ho jā.egī

dāġh-e-dil ban jā.egā furqat meñ terī rashk-e-māh
yuuñ bhī mere ġham-kade meñ raushnī ho jā.egī

sūraj kī sunahrī kirnoñ se tābinda ruḳh-e-ālam na sahī
āsār-e-sahar to paidā haiñ kam zulmat-e-shām-e-ġham na sahī

ādāb-e-chaman se nā-vāqif zanjīr bapā dīvānoñ ko
ta.amīr-e-chaman kī fikr to hai taḳhrīb-e-chaman kā ġham na sahī

haañ yaad hameñ bhī kar lenā āsā.ish-e-manzil se pahle
ai qāfile vaalo ġham na karo ai manzil-e-jānāñ ham na sahī

gudāz-e-ātish-e-ġham siiñ huī haiñ bāvlī añkhiyāñ
añjhū ke bhāñt paanī ho ke maaTī meñ rulī añkhiyāñ

na hove dard-e-sar 'yakrū' kuuñ paidā garmī-e-ġham suuñ
agar dekheñ piyā ke mukh kā rañg-e-sandalī añkhiyāñ

kyā ġham jo hasratoñ ke diye bujh ga.e tamām
dāġhoñ se aaj ghar meñ charāġhāñ kareñge ham

kisī lamhe akelā-pan agar mahsūs ho dil ko
ḳhayāl-e-yār ke dāman se kuchh ġham DhūñD letā hai