Tags-Gham

ek ko ek na aatā thā nazar hosh the ġham
bazm meñ shab ko jo zikr us kī kamar kā niklā

aaj us bazm meñ yuuñ dād-e-vafā dī jaa.e
ai ġham-e-ishq tirī umr baḌhā dī jaa.e

us ke ġham hī se hai har dard kā rishta ab tak
dil pe jab choT lage us ko duā dī jaa.e

shahr kitnā jo koī un meñ sarishk-e-afshāñ ho
rū-kash-e-giryā-e-ġham hausla-e-hamūñ hai

marhala koī judā.ī kā jo darpesh huā
to tabassum kī ridā ġham ko uḌhā lī maiñ ne

har nafas hashr-ba-dāmāñ hai junūn-e-ġham meñ
kis tarah ahl-e-mohabbat ko qarār aa jaa.e

huuñ mutma.in ki huuñ āsūda-e-ġham-e-jānāñ
majāl kyā ki ḳhushī dekhe aañkh bhar ke mujhe

chehre se maiñ ne ġham kī lakīreñ miTā to diiñ
lekin jo karb ruuh kī gahrā.iyoñ meñ thā

ġham-e-sūd-o-ziyāñ se be-niyāzāna nikaltā hai
baḌī farzāngī se terā dīvāna nikaltā hai

mujhe gum-shuda dil kā ġham hai to ye hai
ki is meñ bharī thī mohabbat kisī kī

ġham husn-e-mukammal thā dil hairat-e-kāmil thā
tasvīr kā ā.īna tasvīr ke qābil thā

ġham agar palkoñ pe tham jaa.e to aañsū kahiyo
aur bah jaa.e to maujoñ kī ravānī kahnā

hāl-e-hijrāñ pūchhte kyā ho ki sūrat dekh lo
saaf zāhir hai marīz-e-ġham gayā-guzrā huā

sadā-e-sāz nahīñ ham-navā-e-ġham hī sahī
hameñ suno ki hameñ e'tibār-e-naġhma haiñ

kisī ḳhayāl meñ bas zindagī guzar jaa.e
ġham-e-firāq o ummīd-e-visāl hī kyā hai

ġham bhī hai udāsī bhī tanhā.ī bhī aañsū bhī
sab kuchh to mayassar hai dil māñge to kyā māñge

karam ke is daur-e-imtihāñ se vo daur-e-mashq-e-sitam hī achchhā
na zindagī kī ḳhushī hī achchhī na be-sabātī kā ġham hī achchhā

yaaro safīna-e-ġham-e-dil kā banegā kyā
lagtā hai ab kahīñ koī sāhil nahīñ rahā

chheḌ deñ gar qissa-e-ġham shaam se
ki raheñge sub.h tak ārām se

jalāo ġham ke diye pyaar kī nigāhoñ meñ
ki tīrgī hai bahut zindagī kī rāhoñ meñ