Tags-Gham

ham jaise sarkash bhī ro diye haiñ
ab ke kuchh aisā ġham aa paḌā hai

tumhārā ġham bhī hai ai 'ramz' apne ġham jaisā
matā.a-e-mushtarka ye ġhazal ke naam kareñ

kāfir ko hai bandagī butoñ kī ġham-ḳhvār
momin ke liye bhī hai ḳhudā-e-ġhaffar

chaak dāman bhī huā chāk-e-garebāñ kī tarah
aañkh barse hai shab-e-ġham abr-e-bārāñ kī tarah

ai asīr-e-ġham sāhil idhar aa
beach dhāre se pukārā dariyā

abhī to huuñ dar-o-dīvār hī se mahv-e-kalām
harīf-e-daulat-e-ġham koī rāzdāñ bhī to ho

maiñ talḳhī-e-hayāt se ghabrā ke pī gayā
ġham kī siyāh raat se ghabrā ke pī gayā

dil kā lahū nigāh se Tapkā hai bār-hā
ham rāh-e-ġham meñ aisī bhī manzil se aa.e haiñ

qubūl kar ke terā ġham ḳhushī ḳhushī maiñ ne
tire jamāl ko baḳhshī hai zindagī maiñ ne

ġham kā ḳhazāna terā bhī hai merā bhī
ye nazrāna terā bhī hai merā bhī

mujh ko har ġham navāzne vaale
har ḳhushī sauñptī thī maiñ tum ko

ġham-e-jahāñ se maiñ uktā gayā to kyā hogā
ḳhud apnī fikr meñ ghulne lagā to kyā hogā

jam.a ham ne kiyā hai ġham dil meñ
is kā ab suud khaa.e jā.eñge

yahī achchhā huā mahfil meñ terī chup rahe varna
ġham-e-dil kī kahānī aur phir tarz-e-bayāñ apnā

falak detā hai jin ko aish un ko ġham bhī hote haiñ
jahāñ bajte haiñ naqqāre vahīñ mātam bhī hote haiñ

ġham-e-pinhāñ se dam ghuTtā hai ai 'sīmāb' kyā kahiye
ḳhudā aisā kare ye qābil-e-iz.hār ho jaa.e

hadīs-e-shauq abhī muḳhtasar hai chup rahiye
abhī bahār kā kyā ġham abhī junūñ bhī nahīñ

dil meñ ġham aañkh meñ hañsī dekhī
yuuñ bhī ashkoñ kī ḳhud-kushī dekhī

imkāñ nikal aa.e haiñ 'adam' sulh ke kuchh kuchh
kal shab ġham-e-hastī se mirī baat huī hai

na hai 'shā.ir' ab ġham-e-nau-ba-nau na vo dāġh-e-dil na vo aarzū
jinheñ e'timād-e-bahār hai vahī phuul rañg badal ga.e