Tags-Gham

miltā hai qaid-e-ġham meñ bhī lutf-e-fazā-e-bāġh
chāk-e-qafas se aatī hai farfar havā-e-bāġh

guzar ke aa.ī huuñ maiñ ġham ke regzāroñ se
nazar udaas hai dil hai dukhā huā merā

ab to ḳhushī kā ġham hai na ġham kī ḳhushī mujhe
be-his banā chukī hai bahut zindagī mujhe

tulū-e-sub.h ġham-e-zindagī ko zid ye hai
ki mere ḳhvāb ke lamhe ġhurūb ho jaa.eñ

jo kuchh thā paas apne duniyā ne le liyā hai
ik jaan rah ga.ī hai vo ġham-gusār leñge

asīroñ kī daulat asīrī kā ġham
na.e daam tere purāne tire

ġham-e-jānāñ ġham-e-hastī ġham-e-hālāt 'shakīl'
kyā kahūñ kitnī balā.eñ haiñ mirī jaan ke saath

kuchh dil bhī hai merā ġham-e-ayyām se bojhal
kuchh shaam kī dahlīz se uThtā hai dhuāñ bhī

āftāb-e-dāġh-e-saudā kī harārat dekh kar
chhāñv meñ dil tuftgān-e-ġham ko biThlātī hai teġh

shafaq huuñ sūraj huuñ raushnī huuñ
salīb-e-ġham par ubhar rahā huuñ

vo mere apne hī ġham the 'sābir'
ki jin se maiñ be-ḳhabar rahā huuñ

ye ziist hai 'fuzail' ki dariyā-e-dard hai
har lamha ġham kī umDī huī lahar ban gayā

sarhad-e-ġham ke ilāqoñ meñ idhar ho ki udhar
mujh ko har dasht ġhazal hī kī zamīñ lagtā hai

vo agar aa mileñ to kyā hai ajab
ġham se kuchh aur ho gayā huuñ maiñ

ālām-e-rozgār ko āsāñ banā diyā
jo ġham huā use ġham-e-jānāñ banā diyā

jo miTā hai tere jamāl par vo har ek ġham se guzar gayā
huiiñ jis pe terī navāzisheñ vo bahār ban ke sañvar gayā

sitam to ye hai ki vo bhī na ban sakā apnā
qubūl ham ne kiye jis ke ġham ḳhushī kī tarah

sitāroñ se shab-e-ġham kā to dāman jagmagā uThThā
magar aañsū bahā kar hijr ke māroñ ne kyā paayā

parvarish ġham kī tire yaañ ta.iiñ to kī dekhā
koī bhī daaġh thā siine meñ ki nāsūr na thā

dāstān-e-dil-e-ḳhūñ-gashta kahāñ tak 'sāhir'
ab ġham-e-zāt se haT kar ġham-e-duniyā likkheñ