Tags-Gham

ye tirā ehsān hai jo tū ne apnā ġham diyā
ġham meñ Dhal jaane kī aadat tere dīvāne meñ hai

ġham ziyāda haiñ bahut āñkheñ haiñ sahrā sahrā
ab to aa jaa.e yahāñ ashkoñ kā sailāb koī

tum ne jis ko ġham-e-ayyām kahā hai yaaro
vo mire dard kā hissa hai tumhārā kyā hai

ham ne sauġhāt samajh kar to use apnāyā
ab ye kyuuñ socheñ ki is ġham kā mudāvā kyā hai

āb-e-hayāt vasl siiñ de umr-e-jāvedāñ
hai be-qarār ġham siiñ tire nīm-jān-e-hijr

vo āshiqī kī misl meñ manzūr hai mudām
chille maiñ ġham ke baiTh jo khīñchā kamān-e-hijr

tumhāre ġham meñ koī aañkh nam nahīñ hogī
havā ke karb kā ehsās kis ko hotā hai

jism-o-jāñ kis ġham kā gahvāra bane
aag se nikle to añgāra bane

ye har taraf hai koī mahfil-e-tarab barpā
ki bazm-e-ġham-e-zadagāñ hai mujhe nahīñ mālūm

mujh ko ḳhud apnī tabāhī par taras aatā nahīñ
ḳhūgar-e-ġham is qadar ab to tabī.at ho ga.ī

zindagī vo jo harīf-e-ġham-e-ayyām rahe
dil shikasta hai to kyā saaz uThāo to sahī

vo mast-e-hāl hai 'vasfī' ki us ko
ġham-e-dil hai ġham-e-daurāñ nahīñ hai

koī zahr-e-ġham piye tā-ba-kai huī sarf-e-sāġhar-e-ġhair mai
na vo joshish-e-sar-e-shām hai na vo va.ada-e-shab-e-māh hai

ġham se rishta bahut purānā hai
mere bachpan kā yaar hai sāhab

ġham-e-dil kā asar har bazm meñ hai
sab afsāne us afsāne se nikle

nikalte ham na ġham-ḳhāne se 'aḳhtar'
hasīñ mausam ke bahkāne se nikle

dil hī dil meñ dard ke aise ishāre ho ga.e
ġham zamāne ke sharīk-e-ġham hamāre ho ga.e

Dūbne vāloñ se zaa.id khā rahā hai un kā ġham
jin ko sāhil teġh-e-uryāñ ke kināre ho ga.e

ashk-e-ġham meñ nūr-e-rahmat is tarah shāmil rahā
chāñd-tāroñ se sivā ye chāñd-tāre ho ga.e

haif gulzār-e-jahāñ meñ chhā ga.ī ġham kī ghaTā
jo shagūfe the chaman meñ vo sharāre ho ga.e