Tags-Gham

daur-e-ishrat ne sañvāre haiñ ġhazal ke gesū
fikr ke pahlū magar ġham kī badaulat aa.e

laakh duniyā ne ye chāhā ki pareshāñ ho magar
maiñ tire ġham kī hifāzat meñ pareshāñ na huā

apnī paiġhām-navā.ī ke natā.ej meñ mujhe
fikr-e-zindāñ to rahā hai ġham-e-zindāñ na huā

shauq kī kam-nigahī bhī hai gavārā mujh ko
ġham to ġham aaj ḳhushī bhī hai gavārā mujh ko

vahī aañkh be-bahā hai jo ġham-e-jahāñ meñ Duube
vahī jaam jaam hai jo baġhair farq chhalke

sub.h-e-shādābi-e-jāñ kā kyuuñ hai malāl
ishrat-e-shām-e-ġham kis ke hone se hai

maiñ duur bhī tum se jī lūñgā tum mere liye kuchh ġham na karo
maanā ki pareshāñ dil hogā aisā bhī pareshāñ kyā hogā

kaam māshūqoñ se bhī āshiq ke letā hai ye ishq
kyuuñ na shīrīñ jaan de apnī ġham-e-farhād meñ

barsoñ ġham-e-hālāt kī dahlīz pe kuchh log
gul kar ke diye zehnoñ ke ḳhvābīda rahe haiñ

ik ḳhushī gar tū jo mujh ko de sake to
saare ġham ko bhuul jaanā chāhtī huuñ

malāmateñ ġham-o-ālām fikr māyūsī
ye zindagī hai shikasta kitāb kī sūrat

aañkh se jaarī rahā ashkoñ kā bahnā kyūñkar
ġham ne Thukrāyā to phir zaḳhm purāne dekhe

aap kā jurm nahīñ ham hī ḳhatā kar baiThe
dil ne bas chāhā tumheñ ġham ne Thikāne dekhe

ham pe ulfat kī huī aisī atā.eñ 'bāliġh'
jis taraf DhūñD liye ġham ke ḳhazāne dekhe

sa.ī-e-zabt-e-ġham-e-bedād kiye jaatā huuñ
puḳhta-tar ishq kī buniyād kiye jaatā huuñ

dil ko vaqf-e-ġham-e-bedād kiye jaatā huuñ
apnā ghar aap hī barbād kiye jaatā huuñ

ġham-e-hayāt sharīk-e-ġham-e-mohabbat hai
milā diye haiñ kuchh aañsū mirī sharāb ke saath

mazāq-e-ġham uḌānā ab mujhe achchhā nahīñ lagtā
kisī kā muskurānā ab mujhe achchhā nahīñ lagtā

masarrat aur ġham donoñ kī koī had zarūrī hai
kisī bhī ek shai kā silsila achchhā nahīñ lagtā

yuuñ umañDtā hai tirā ġham ab tak
koī sāvan kī nadī ho jaise