Tags-Dil

phir bahār aa.ī hai jī umDā hai yād-e-dost meñ
dil kare zaarī aur āñkheñ ashk-bārī in dinoñ

aah ye barsāt kā mausam ye zaḳhmoñ kī bahār
ho gayā hai ḳhūn-e-dil āñkhoñ se jaarī in dinoñ

TukḌe jigar ke hoñ ki Tapaktā ho ḳhūn-e-dil
unvāñ jo tum nahīñ to tumheñ dāstāñ se kyā

utregā jab ḳhumār vahī hoñge ranj-o-ġham
dil ko sukūñ milegā mai-e-arġhavāñ se kyā

ai dil hai kis liye tujhe āvārgī kā shauq
tū bhī bichhaḌ gayā hai kisī kārvāñ se kyā

ai dil-e-nā-āqibat-andesh zabt-e-shauq kar
kaun lā saktā hai tāb-e-jalva-e-dīdār-e-dost

chashm-e-mā raushan ki us bedard kā dil shaad hai
dīda-e-pur-ḳhūñ hamārā sāġhar-e-sarshār-e-dost

mere rone se dil-e-sañg jo aab aab na ho
kohsāroñ se gire phir na dhaḌā-dhaḌ paanī

dil meñ ḳhayāl-e-ishq thā mehmān kī tarah
armāñ sajā thā 'mīr' ke dīvān kī tarah

tevar se us ke aag tamannā meñ lag ga.ī
jalne lagā hai dil mirā shamshān kī tarah

kis ko sunā.ūñ hāl-e-ġham koī ġham-āshnā nahīñ
aisā milā hai dard-e-dil jis kī koī davā nahīñ

apnā banā ke ai sanam tum ne jo aañkh pher lī
aisā bujhā charāġh-e-dil phir ye kabhī jalā nahīñ

dil dil hī rahegā gul-e-tar ho nahīñ saktā
ḳhuuñ ho ke bhī manzūr-e-nazar ho nahīñ saktā

le jā.egā ye dil mujhe us bazm meñ āḳhir
jis meñ ki sabā kā bhī guzar ho nahīñ saktā

ḳhud vafā hai mirī shāhid ki vafādār huuñ maiñ
laakh tum dil se bhulāo to bhulā.e na bane

dil ke har zarra meñ hai soz-e-mohabbat kī numūd
ḳhaak meñ in ko milā.ūñ to milā.e na bane

dil ko ab tāb-e-talāfī o mudāvā abhī nahīñ
chāragar aa.e to ehsān uThā.e na bane

maiñ ne chāhā sunā.ūñ kuchh dil ko
dil bhī apnī sunā rahā hai mujhe

tujhe laakh log hasīñ kaheñ tujh laakh durr-e-samīñ kaheñ
tirī qadr hogī faqat yahīñ to harīm-e-dil ke adn meñ aa

apnī kaheñ ki is dil-e-ḳhāna-ḳharāb kī
tum ko jo ho pasand vahī guftugū kareñ