Tags-Dil

maiñ kis gintī meñ huuñ aur ik mire dil kī haqīqat kyā
hazāroñ jaan dete haiñ vo sūrat hī kuchh aisī hai

koī aa.e ye aatī hai koī jaa.e ye jaatā hai
mirā dil hī kuchh aisā hai tabī.at hī kuchh aisī hai

dil hai yaarā koī makān nahīñ
har kisī ko diyā nahīñ karte

jin ke dil meñ junūn-o-ulfat ho
shauq-e-ḳhanda rakhā nahīñ karte

dil aisā makāñ hai jo agar TuuT gayā to
lag jā.eñgī sadiyāñ na.ī ta.amīr meñ likh de

pheñk aa.e us ko jā ke vo kū-e-raqīb meñ
miTTī ḳharāb mere dil-e-mubtalā kī hai

detā huuñ dil ḳhushī se mirī jaan chhoḌiye
is ko na lījiye ye amānat ḳhudā kī hai

dil ko hāsil ḳhushī nahīñ hotī
ek pal zindagī nahīñ hotī

ye dard-e-dil ye aañsū zaḳhm saare
kisī kī mehrbānī likh rahā huuñ

dil ke bujhne kā havāoñ se gilā kyā karnā
ye diyā naza.a ke aalam meñ to kal raat se thā

markaz-e-shahr meñ rahne pe musir thī ḳhilqat
aur maiñ vābasta tire dil ke mazāfāt se thā

vo baat zarā sī jise kahte haiñ ġham-e-dil
samjhāne meñ ik umr guzar jaa.e hai pyāre

bas ek jaan bachī thī chhiḌak dī rāhoñ par
dil-e-ġharīb ne ik ehtimām saada kiyā

aañkh meñ aañsū Thahrā hai
dil par ġham kā pahrā hai

ik din bhar hī jā.egā
ghaav jo dil meñ gahrā hai

ḳhauf kahāñ mere dil meñ
ye sardī kā lahrā hai

ishq sunte the jise ham vo yahī hai shāyad
ḳhud-baḳhud dil meñ hai ik shaḳhs samāyā jaatā

dil meñ phailī hai yuuñ raushnī yaad kī
jaise vīrān mandir meñ dīpak jale

kuchh us ke aariz kī dil-farebī kuchh us ke hoñToñ kā rañg dilkash
vo sar se pā hai ġhazal kā lahja nayā nayā sā shabāb jaisā

aayā hai magar ishq meñ dildār hamārā
har tan meñ huā jaan har ik jism kā nyārā