Tags-Dil

ab to had se baḌh ga.ī thiiñ apne dil kī uljhaneñ
muskurā kar aap ne ġham kā mudāvā kar diyā

nazar aa jaate haiñ tum ko to bahut nāzuk baal
dil mirā kyā vahī ai shīsha-girāñ hai ki jo thā

tīra-baḳhtī nahīñ jaatī dil-e-sozāñ kī 'firāq'
sham.a ke sar pe vahī aaj dhuāñ hai ki jo thā

zabān kholiye ḳhalvat meñ be-hijābāna
chhupā.ī jaatī hai kab dil kī baat mahram se

aaj phir band-o-salāsil kā ḳhayāl aayā hai
zulf-e-pur-pech kā aur dil kā ḳhayāl aayā hai

aaj phir aañkh se Tapkā hai koī qatra-e-ḳhūñ
ba.ad muddat hameñ phir dil kā ḳhayāl aayā hai

dil ko us but se hai phir ajr-e-vafā kī ummīd
sa.ī-e-be-sūd meñ hāsil kā ḳhayāl aayā hai

phir aa.ī fasl-e-gul ai yaar dekhiye kyā ho
junūñ kā dil meñ chubhā ḳhaar dekhiye kyā ho

huā hai ye dil-e-dīvāna qābil-e-zanjīr
khule haiñ gesū-e-dildār dekhiye kyā ho

tumhāre dil meñ aur merā tasavvur ho nahīñ saktā
tumhāre dil meñ koī dūsrā mālūm hotā hai

tumhāre dil meñ jo kuchh aa.e pinhāñ rah nahīñ saktā
tumhārā dil to koī ā.īna mālūm hotā hai

adl kī shakl se zāhir us kā dil shikasta hai
chaman meñ aur koī gul khilā mālūm hotā hai

jab dil kī ḳhalish baḌh jaatī hai majbūr jab insāñ hotā hai
jiinā jise mushkil ho jaa.e marnā use āsāñ hotā hai

ai zāhid-e-ḳhud-bīñ rahmat-e-haq āġhosh meñ us ko le legī
jo apne gunāhoñ par dil meñ har-vaqt pashemāñ hotā hai

ye ishq-o-vafā kī bāteñ haiñ pūchhe koī 'shañkar' ke dil se
vo sāmne jab aa jaate haiñ har saañs ġhazal-ḳhvāñ hotā hai

kitāb-e-dil ko dīmak lag ga.ī hai
tumhārā naam kyā hai DhūñDhtā huuñ

hazāroñ daaġh haiñ mere badan par
na jaane kis ke dil kā rāsta huuñ

hisāb-e-roz-e-mahshar se nahīñ kuchh 'barq' ko ḳhatra
jo terī yaad is ke dil meñ bastī hai gurū-nānak

dil-e-shā.ista-e-ġham ne lagā rakkhī hai siine se
hazār un kī nazar ġhārat-gar-e-ārām-o-rāhat hai

maiñ aa.uuñ va.az meñ sau baar jab ye dil bhī aane de
karūñ kyā vā.izo rindoñ kī sohbat hī kuchh aisī hai