Tags-Dil

imkāñ kī had ke andar koshish kī had se bāhar
dil jis ko DhūñDhtā hai vo hai bhī aur nahīñ bhī

ummīd-e-dil kī fitrat hai be-niyāz taskīñ
kam ho na be-qarārī aa.e agar yaqīñ bhī

bīm-o-rajā se dil meñ dariyā kā jazr-o-mad hai
sāhil-navāz maujeñ aa.iiñ bhī aur ga.iiñ bhī

kar pahle dil pe qaabū jaame kī phir ḳhabar le
dāman bachāne vaale jaatī hai āstīñ bhī

na kamī koī tire naaz meñ na kamī hai zauq-e-niyāz meñ
to vafā.eñ merī hī pesh kar mire ḳhūn-e-dil ke javāz meñ

mirī ḳhaak meñ tirī saañs hai tirī raushnī mire paas hai
mujhe dil diyā sanam-āshnā mirā sar jhukā hai namāz meñ

izn-dar-izn chamakte the sitāre dil ke
aaj sab ko tirī āñkhoñ meñ utar jaanā thā

vaa.e is dil ko na denī thī kabhī ruḳhsat-e-hijr
tere hoñToñ ke qadam chuum ke mar jaanā thā

aur phir yuuñ hai ki rakhtī thiiñ jo is dil ko ḳharāb
un nigāhoñ ko tirī aur sañvar jaanā thā

jaatī hī nahīñ dil se tirī yaad kī ḳhushbū
maiñ daur-e-ḳhizāñ meñ bhī mahaktā hī rahā huuñ

nigāh-o-dil meñ bhī lāzim hai ik muravvat-o-kaif
numūd-e-āriz-o-gesū hī dilbarī to nahīñ

na jaane kyuuñ mire dil ko yaqīñ nahīñ aatā
jo tū ne jalva dikhāyā hai aarzī to nahīñ

dil ke dīvār-o-dar pe kyā dekhā
bas tirā naam hī likhā dekhā

dil ḳhush huā hai masjid-e-vīrāñ ko dekh kar
merī tarah ḳhudā kā bhī ḳhāna ḳharāb hai

hai barbat-e-dil saḳhti-e-mizrāb se larzāñ
talḳhi-e-mohabbat kā maza paa.e hue haiñ

maiñ jitnā DhūñDhtā huuñ us ko utnā hī nahīñ paatā
kidhar hai kis taraf hai aur kahāñ hai dil ḳhudā jaane

na sair-e-lāla-o-gul ham ko kuchh nazar aa.ī
ki nok-e-har-mizha par yaañ dil-figār rahā

jab yaar ne raḳht-e-safar bāñdhā kab zabt kā paarā us din thā
har dard ne dil ko sahlāyā kyā haal hamārā us din thā

jab tujh se zarā ġhāfil Thahre har yaad ne dil par dastak dī
jab lab pe tumhārā naam na thā har dukh ne pukārā us din thā

jo dil meñ hai use nā-gufta rahne de to behtar hai
badaltī sūrat-e-harf-o-ma.ānī kā tamāshā kar