Tags-Dil

mil gayā ḳhaak meñ ḳhud un kī hifāzat ke liye
shauq-o-armāñ kā muhāfiz tujhe ai dil dekhā

ḳhanjar-e-abrū teġh-e-nigah taqrīr-e-musalsal chashm-e-siyāh
tez bhī hai ḳhūñ-rez bhī dil-āvez bhī hai mastāna bhī

ḳhalvat-e-dil meñ chain se baiTho kis se takalluf karte ho
ghar hai tumhārā tum ho yahāñ mehmān bhī sāhab-ḳhāna bhī

jo dil meñ us ko basā.e vo aur kuchh na kare
vo ruup hai ki use dekhiye to jī na kare

jo dard dil meñ uThe aah khīñchne se Dare
vo aa.ina hai ki mauj-e-havā shikast kare

fazā mahdūd kab hai ai dil-e-vahshī falak kaisā
nilāhaT hai nazar kī dekhte haiñ jo nigāhoñ se

hameñ to jalte dil kī raushnī meñ aage baḌhnā hai
haTā do qumqume bijlī ke nā-hamvār rāhoñ se

mire nāloñ ke sab shākī koī un ko nahīñ kahtā
khurachte rahte haiñ jo zaḳhm-e-dil ḳhūnī nigāhoñ se

pilā do zahr-e-ġham dil ko na chhoḌe gar havas-kārī
gunah vo ek achchhā jo bachā le sau gunāhoñ se

sirf dil hī nahīñ jalā merā
zarre zarre meñ us ke bastī thī

ik martaba dil pe iztirābī aa.ī
ya.anī ki ajal merī shitābī aa.ī

milī jo dil ko ḳhushī to ḳhushī se ghabrā.e
ham ajnabī kī tarah zindagī se ghabrā.e

yaad use ik pal bhī karne kī mujhe fursat nahīñ
mubtalā sadiyoñ se merā dil hai jis ke pyaar meñ

ummīd ne bhī yaas ke murdoñ ko pukārā
aa.ī koī āvāz na dil se na jigar se

mauj-e-nafas se larze hai tār-e-rag-e-hayāt
phailī hai shahr-e-dil meñ vo pur-haul sansanī

tum se bichhḌe dil ko ujḌe barsoñ biit ga.e
āñkhoñ kā ye haal hai ab tak kal kī baat lage

ḳhat meñ dil kī bāteñ likhnā achchhī baat nahīñ
ghar meñ itne log haiñ jaane kis ke haat lage

ghuum phir kar dasht-o-sahrā phir vahīñ le aa.e paañv
dil nahīñ hai shāyad is nazzāre se be-zār abhī

ai mire armān-e-dil bas ik zarā kuchh aur sabr
raat abhī kaTne ko hai milne ko bhī hai yaar abhī

jazba-e-dil dekhnā bhaTkā na denā raah se
muntazir hogā mirā bhī ḳhud mirā dil-dār abhī