Tags-Dil

dil ke ḳhirman meñ nihāñ haiñ sho.ale
apne dāman kī havā de koī

ho ga.e maġhrūr mujh ko āshiq apnā jaan kar
haa.e is dil kā burā ho aah ne dhokā diyā

ye kyā kam hai ki mere dil meñ pinhāñ daulat-e-ġham hai
maiñ akasr apnī palkoñ ko sitāroñ se sajātā huuñ

dil-e-vahshat-zada kā 'intizār' ab to ye aalam hai
ki ḳhud apnā nasheman apne hāthoñ se jalātā huuñ

'hafīz' apne parā.e ban rahe haiñ
ki maiñ dil ko zabāñ pe lā rahā huuñ

tishnagī kī aañkh meñ be-samt tevar dekh kar
kitne dariyā-dil samundar bhī nadī hone lage

ishq betāb-e-jāñ-gudāzī hai
husn mushtāq-e-dil-navāzī hai

hamesha tum ne apnā-āp apnī jeb meñ rakkhā
magar phir bhī kushāda-dil kushāda-dast kahlā.e

hai soz-e-dil hī rāz-e-zindagānī
hayāt-e-sham.a hai sirf us kī lau meñ

koī halchal hai na aahaT na sadā hai koī
dil kī dahlīz pe chup-chāp khaḌā hai koī

ab hijr na visāl na saudā tire baġhair
dukhtā hai dil bhī dard ke maare ghaḌī ghaḌī

bahut jī chāhtā hai har kisī se pyaar karne ko
magar aisī kahāñ qismat ki dil mujh ko Darātā hai

dil kī vahshat bhī ajab vahshat hai
saath rahtī hai jidhar jaate haiñ

dām-o-qafas na chāhiye dil ke shikār kuuñ
kartī haiñ band aañkh ke Doroñ kī Doriyāñ

hai bas ki daur-e-sāġhar-e-chashm-e-parī-ruḳhāñ
gir ga.ī haiñ dil ke taaq señ nargis kī ġhoriyāñ

hañste ho kyuuñ jo tum ne mirā dil nahīñ liye
ma.alūm huiiñ tumhārī nigāhoñ kī choriyāñ

shab-e-māhtāb ne shah-nashīñ pe ajiib gul sā khilā diyā
mujhe yuuñ lagā kisī haath ne mire dil pe tiir chalā diyā

yahī aan thī mirī zindagī lagī aag dil meñ to uf na kī
jo jahāñ meñ koī na kar sakā vo kamāl kar ke dekhā diyā

faqat paas meñ us ke ma.asūm dil hai
magar kis qadar muztarib muzmahil hai

habāb ashkoñ ke Dhāltā jā kamāl-e-shīsha-garī dikhā tū
tujhe inhīñ nāzuk ābgīnoñ meñ dil kī tasvīr bhī milegī