dekhte haiñ na Thahar jaate haiñ
log raste se guzar jaate haiñ
kitne dariyā haiñ magar āḳhir meñ
ik samundar meñ utar jaate haiñ
dekhne kaun hameñ aatā hai
DhūñDne kis ko idhar jaate haiñ
dil kī vahshat bhī ajab vahshat hai
saath rahtī hai jidhar jaate haiñ
manzileñ gard meñ kho jaatī haiñ
rāste dhuup se bhar jaate haiñ
din nikaltā hai kahāñ se 'sīmān'
shaam ke saa.e kidhar jaate haiñ