Tags-Dil

dil ne har daur meñ duniyā se baġhāvat kī hai
dil se tum rasm-o-rivāyāt kī bāteñ na karo

vasvase dil meñ na rakh ḳhauf-e-rasan le ke na chal
azm-e-manzil hai to ham-rāh thakan le ke na chal

kuchh dard jagā.e rakhte haiñ kuchh ḳhvāb sajā.e rakhte haiñ
is dil ke sahāre jīvan meñ ham baat banā.e rakhte haiñ

kyā us se kaheñ aur kaise kaheñ un rañg badaltī āñkhoñ se
kyā shauq umaDte haiñ dil meñ kyā vahm satā.e rakhte haiñ

sad-rañg nazāre the jis meñ vo dil kā chaman kyā tum se kaheñ
kyuuñ us ko ujaaḌ ke baiThe haiñ kyuuñ ḳhaak uḌaa.e rakhte haiñ

muhtāj nahīñ hai kisht-e-jāñ mausam ke badalte dhāroñ kī
kuchh daaġh to dil meñ be-mausam sau phuul khilā.e rakhte haiñ

nahīñ us meñ rahm-o-hayā kuchh vo qātil
baḌā sañg-dil hai baḌā be-muravvat

bahār aa.ī kisī kā sāmnā karne kā vaqt aayā
sambhal ai dil ki iz.hār-e-vafā karne kā vaqt aayā

ravāñ haiñ apne markaz kī taraf āsūda ummīdeñ
hujūm-e-yās ko dil se judā karne kā vaqt aayā

kahāñ tak ḳhatm rahtā darmiyāñ par dil kā afsāna
bil-āḳhir darmiyāñ se ibtidā karne kā vaqt aayā

nigāh o dil se ab tafsīr-o-sharh-e-āzrū hogī
zabān o lab se tark-e-iltijā karne kā vaqt aayā

vo aate haiñ 'shakīl' ab apne dil se haath dho baiTho
nigāh-e-nāz kī qīmat adā karne kā vaqt aayā

apnā har lafz utāregā mire zehan meñ phir
dil meñ jo baat chhupī hai vo bachā jā.egā

hotī nahīñ hai dil ko tasallī kisī tarah
jab tak maiñ darmiyān kā parda uThā na duuñ

so bhī jā ai dil-e-majrūh bahut raat ga.ī
ab to rah rah ke sitāroñ ko bhī niiñd aatī hai

nāma-bar kī yā kabūtar kī ki dil kī rakhiye aas
apne to yaañ se ga.e jo vaañ vo mar kar rah ga.e

kal kisī kā zikr-e-ḳhair aayā thā majlis meñ 'hasan'
is dil-e-betāb par ham haath dhar kar rah ga.e

tū agar dil meñ ek baar aa.e
umr bhar ke liye qarār aa.e

'arsh' vo be-qarāriyāñ na rahīñ
dil ko ab kis tarah qarār aa.e