Tags-Dil

umr bhar ham rahe sharābī se
dil-e-pur-ḳhūñ kī ik gulābī se

naam kitne hī likhe haiñ dil kī ik mehrāb par
hogā in meñ hī tumhārā naam bhī DhūñDo zarā

ek miTte lafz ke bhī kaam aa jaao kabhī
sañg-e-dil par miTne se pahle mujhe likh lo zarā

havas kā daam phailāyā huā hai
dil-e-ma.asūm ghabrāyā huā hai

kisī shīshe pe baal aayā huā hai
dil-e-ġhamnāk tharrāyā huā hai

nigāh-e-nāz kā rishta jo dil ke ghaav se hai
ye āb-o-rañg-e-tamannā isī lagāv se hai

kyā ḳhabar thī chaah us kī dil meñ ghar kar jā.egī
mujh ko ḳhud mere hī andar dar-ba-dar kar jā.egī

rok lo is dard kī devī se haiñ sab raunaqeñ
ye ga.ī gar ruuTh kar dil ko khañDar kar jā.egī

kahā thā ham ne tujhe to ai dil ki chaah kī mai ko tū na piinā
jo is ko pī kar tū aisā bahkā ki ham ko mushkil huā hai jiinā

jo āñkheñ chanchal kī dekheñ ham ne to nok-e-mizhgāñ ne dil ko chedā
nigah ne hosh-o-ḳhirad ko luuTā adā ne sabr-o-qarār chhīnā

kahā thā ā.ūñgā do hī din meñ vale na aayā vo shoḳh ab tak
ginā jo ham ne 'nazīr' dil meñ to us suḳhan ko huā mahīna

kyā kahūñ kyā milā hai kyā na milā
dil bhī shāyān-e-dilrubā na milā

ai dil huzūr-e-dost ba-sad ehtirām jā
dāman ko chaak kar na garebāñ ko chaak kar

na chhoḌā dāman-e-hosh-o-ḳhirad dil ne mohabbat meñ
sazā-e-dil hisār-e-āgahī kī qaid-e-tanhā.ī

dil-e-muztar se pūchh ai raunaq-e-bazm
maiñ ḳhud aayā nahīñ laayā gayā huuñ

hāl-e-dil pūchhte ho kyā tum ne
hote dekhā hai dil udaas kahīñ

mere dil ko bhī na hove havas-e-bosa agar
āshnā lab se tire lab na ho paimāne kā

haath uThtā nahīñ ai yaar jo suljhāne se
dil tirī zulf se uljhā hai magar shāne kā

mirī jaañ go tujhe dil se bhulāyā jā nahīñ saktā
magar ye baat maiñ apnī zabāñ par lā nahīñ saktā

kuchh log dil kī aaḌ meñ rū-posh ho ga.e
āñkhoñ meñ ḳhvāb aa.e to ḳhāmosh ho ga.e