Tags-Dil

dil se ho kar dil talak jaayā karo
beach ke raste na apnāyā karo

dil bas ik larzish-e-paiham hai sarāpā yaanī
tere ā.īna ko aatā nahīñ hairāñ honā

rāhat-e-anjām-e-ġham aur rāht-e-duniyā mālūm
likh diyā dil ke muqaddar meñ pareshāñ honā

nekiyāñ kitnī haiñ 'ejāz' hisār-e-dil meñ
ḳhūbiyāñ hoñ to ḳharāboñ meñ na rakkhe koī

dil us kā jigar us kā hai jaañ us kī ham us ke
kis baat se inkār kiyā jaa.e kisī ko

kuchh uqde aise hote haiñ jo na hī khuleñ to behtar hai
kuchh bāteñ aisī hotī haiñ jinheñ dil meñ chhupā lenā achchhā

kisī mausam kī vo bāteñ jo terī yaad kartā huuñ
unhīñ bātoñ ko phir phir kah dil apnā shaad kartā huuñ

ye dil kuchh aaphī ho jaatā hai band aur aaphī khultā hai
na maiñ qaid is ko kartā huuñ na maiñ āzād kartā huuñ

ġhubār-e-dil ko āb-e-teġh se us ke milā kar maiñ
na.e sar se imārat dil kī phir buniyād kartā huuñ

mire ābād dil ko kar ḳharāb us ne kahā hañs hañs
ki maiñ is mulk kā naam ab ḳharāb-ābād kartā huuñ

kabhī tere bhī dil meñ ye guzartī hai ki maiñ nāhaq
bhalā dil par 'hasan' ke itnī kyuuñ be-dād kartā huuñ

merī vahshat ne abhī paañv nikāle bhī na the
dil-e-be-tāb ne zid kī mujhe ghar jaanā hai

maiñ use dil-lagī samajhtā thā
tū ne sach-much bhulā diyā hai mujhe

yārab is be-hisoñ ke shahr meñ kyuuñ
dil-e-dard-āshnā diyā hai mujhe

aaj mere hī dil ne ai 'ābid'
apnā dushman banā diyā hai mujhe

shāna to chhuTā zulf-e-pareshāñ se ulajh kar
suljhā na ye dil kākul-e-pechāñ se ulajh kar

sau pech meñ aayā hai hamārā dil-e-sad-chāk
shāna kī tarah kākul-e-pechāñ se ulajh kar

girdāb-e-balā meñ dil-e-āshiq ko phañsāyā
baalī ne tirī zulf-e-pareshāñ se ulajh kar

jazb-e-dil-e-majnūñ ne kiyā kaam jo apnā
naaqa na rukā ḳhār-e-bayābāñ se ulajh kar

dil kī taraf kuchh aah se dil kā lagāo hai
Tak aap bhī to aa.iye yaañ zor baav hai