Tags-Dil

bujh ga.e saare charāġh-e-jism-o-jāñ tab dil jalā
ḳhalq kī ḳhātir hamārā murshid-e-kāmil jalā

sher dar-asl haiñ vahī 'hasrat'
sunte hī dil meñ jo utar jaa.eñ

hadīs-e-dil ko qalam se na āshnā karnā
kahāniyāñ hī hamesha javāb meñ likhnā

niyyat-e-shauq bhar na jaa.e kahīñ
tū bhī dil se utar na jaa.e kahīñ

kabhī na kahtā thā dil hamārā ki āñ.suoñ ko likheñ sitāra
judā.iyoñ kī kasak se pahle ye isti.āra hī dūsrā thā

ye dāstān-e-ġham-e-dil kahāñ kahī jaa.e
yahāñ to khul ke koī baat bhī na kī jaa.e

dil-e-'iqbāl' pe andoh-e-mohabbat kyā hai
ek bādal hai barasne kā na barsāne kā

aah vo din ga.e ki ham bhī 'asar'
dil ko apne sambhāl rakhte the

ise kuchh aur hī kahiye ki dil dukhtā hai ye sun kar
jab is meñ maut shāmil hai to phir ye zindagī kyoñ ho

agar miliye kisī se aap to dil khol kar miliye
ḳhulūs-e-dil hī jab na ho to phir mil kar ḳhushī kyoñ ho

tamannā ḳhaas dil kī un se is Dar se nahīñ kahte
ki āġhāz-e-mohabbat hī meñ un se dushmanī kyoñ ho

aish sab ḳhush aate haiñ jab talak javānī hai
murda-dil vo hotā hai jo ki sheḳh faanī hai

chaar din kī ishrat par dil lagā na duniyā se
kahte haiñ ki jannat meñ aish-e-jāvedānī hai

dil se kyuuñ nahīñ chāhūñ yaar ko ki ai 'tābāñ'
dil-rubā hai pyārā hai jivḌā hai jaanī hai

chhupātā huuñ magar chhuptā nahīñ dard-e-nihāñ phir bhī
nigāh-e-yās ho jaatī hai dil kī tarjumāñ phir bhī

ab to dil o dimāġh meñ koī ḳhayāl bhī nahīñ
apnā junūn bhī nahīñ us kā jamāl bhī nahīñ

ishq tere ne ujāḌā merā dil
ġhair kī ulfat uge mumkin nahīñ

us kā har tīr-e-nazar dil meñ utar jaatā hai
yuuñ to dekhe haiñ bahut ham ne nishāne vaale

kitne sīnoñ meñ shikasta haiñ abhī dil ke rabāb
lab-e-ḳhāmosh pe haiñ naġhma-e-mātam kitne