Tags-Dil

vaj.h-e-qarār-o-rāhat-e-dil-zadagāñ hai tū ki maiñ
lafz-e-yaqīñ hai tū ki maiñ harf-e-gumāñ hai tū ki maiñ

dair o haram kī raah se dil bach gayā magar
terī galī ke moḌ pe saudā.ī ban gayā

ye dil-lagī kyā hai bād-o-bārāñ hañsī hai ye yā sitam-zarīfī
guloñ ko miTTī meñ kyuuñ milāyā khilā khilā kar hañsā hañsā kar

na rah sake pesh-e-mehr-e-tābāñ gul aur shabnam meñ rabt-e-rasmī
maiñ kaT gayā kal jahāñ se 'kaifī' dil ek dildār se lagā kar

sehn-e-dil meñ jo lagā.e the tamannā ke shajar
aisā lagtā hai vo imsāl bhī phalne ke nahīñ

chāhī thī dil ne tujh se vafā kam bahut hī kam
shāyad isī liye hai gilā kam bahut hī kam

the dūsre bhī terī mohabbat ke ās-pās
dil ko magar sukūn milā kam bahut hī kam

mujhe jāntā bhī koī na thā mire be-niyāz tire sivā
na shikast-e-dil na shikast-e-jāñ ki tirī ḳhushī ko ḳhushī kahā

kahīñ sañg-e-rah kahīñ sañg-e-dar ki maiñ pattharoñ ke nagar meñ huuñ
ye nahīñ ki dil ko ḳhabar na thī ye batā ki muñh se kabhī kahā

hai sarḳhushī kī tamannā bahut mire dil meñ
vo is liye ki ye dil ek dukh-bharā dil hai

dil muzmahil hai terī navāzish ke bāvajūd
ye sarzamīñ udaas hai bārish ke bāvajūd

ek phuul bhī chaman meñ na dil khol kar hañsā
shabnam ke āñsuoñ kī guzārish ke bāvajūd

taraf-e-ka.aba na jā haj ke liye nādāñ hai
ġhaur kar dekh ki hai ḳhāna-e-dil maskan-e-dost

aise na jeb-katre kahīñ haiñ na gaTh-kaTe
pahlū meñ baiThte hī dil us ne uḌā liyā

aatā hai yahī jī meñ fariyād karūñ ro.uuñ
rone hī se Tuk apnā dil shaad karūñ ro.uuñ

yuuñ dil meñ guzartā hai jā kar kisī sahrā meñ
ḳhātir ko Tuk ik ġham se āzād karūñ ro.uuñ

ai 'mus.hafī' aatā hai ye dil meñ ki ab maiñ bhī
rone meñ tujhe apnā ustād karūñ ro.uuñ

raushan hai saarī zindagī is dil kī aag se
aur dil ko aañch ik suḳhan-e-garm se mile

dil ko lapeT letā hai ik reshmīñ ḳhayāl
jab bhī nigāh us nigah-e-narm se mile

is dil ke saare ḳhvāb mohabbat ke sab gulāb
ik sher se khile kabhī ik nazm se mile