chāhī thī dil ne tujh se vafā kam bahut hī kam
shāyad isī liye hai gilā kam bahut hī kam
kyā husn thā ki aañkh lagī saaya ho gayā
vo sādgī kī maar, hayā kam bahut hī kam
the dūsre bhī terī mohabbat ke ās-pās
dil ko magar sukūn milā kam bahut hī kam
jalte sunā charāġh se dāman hazār baar
dāman se kab charāġh jalā kam bahut hī kam
ab ruuh kāñptī hai ajal hai qarīb-tar
ai ham-nasīb nāz-o-adā kam bahut hī kam
yuuñ mat kaho 'ḳhizāñ' ki bahut der ho ga.ī
haiñ āj-kal vo tum se ḳhafā kam bahut hī kam