Tags-Dil

saare ahd kā bojh thā sar par dil meñ saare jahāñ kā ġham
vaqt kā jaltā ubaltā sahrā ham ne jis dam paar kiyā

tum zamāne kī raah se aa.e
varna sīdhā thā rāsta dil kā

mere dil meñ jañgal hai
aur us meñ bheḌiyā rahtā hai

naqsh haiñ ab varaq varaq dil par
chand yādeñ kitāb kī sūrat

gar vo pūchheñge hāl-e-dil 'zākir'
kuchh nahīñ hai javāb kī sūrat

kab dil shikast-gāñ se kar arz-e-hāl aayā
hai be-sadā vo chīnī jis meñ ki baal aayā

kaunain tak milī thī jis dil kī mujh ko qīmat
qismat ki yak nigah par jā us ko Daal aayā

arbāb-e-fahm aage vo sāhab-e-hunar hai
kiina kisī ke dil se jis ko nikāl aayā

milne kā ek dam bhī yaañ zo.af-e-dil hai maan.e
uktā ke uTh gayā vo tab maiñ bahāl aayā

tujh se bichhaḌ kar zinda rahnā apne sog meñ jiinā hai
dil ik phuul thā ḳhushbū vaalā TuuT gayā hai Daalī se

naale kā aaj dil se phir lab talak guzar hai
Tak gosh rakhiyo īdhar saath us ke kuchh ḳhabar hai

dil-e-bīmār rahe ishq meñ kyuuñ kar sarsabz
ḳhaak se daane ko hai nashv-o-numā tīsre din

yādoñ ke phūñk phūñk ke rakhne paḌe qadam
zaḳhmoñ se dil ke jab bhī sañvartī haiñ sīḌhiyāñ

yuuñ dil meñ terī baat utartī hai 'ḳhvāh-maḳhvāh'
gahre kueñ meñ jaise utartī haiñ sīḌhiyāñ

koī zinda rahā hai kab jahāñ meñ
charāġh-e-dil ko apne ḳhud bujhā ke

ye dil hai dil ise siine meñ hargiz
kabhī rakhnā na tum patthar banā ke

'farāz' aksar rahā kartā hai tanhā
añdhere meñ charāġh-e-dil jalā ke

kabhī kabhī to sher bhī hone lagte haiñ
dil kī choT se ḳhush-guftārī miltī hai

abhī tak dil ke vīrāne meñ jaise
tamannā haath phailā.e khaḌī hai

kisī kī yaad 'saif' aur dil kī hālat
ghanā jañgal akelī jhoñpaḌī hai