Tags-Dil

ishq ne jānāñ ye kyā jaadū sā ham pe kar diyā
dil kabhī bhī is ravayye kī taraf maa.il na thā

kuchh gile shikve shikasta dil se kar lenā kabhī
siskiyoñ se yuuñ bhī 'ra.anā' tum ko kuchh hāsil na thā

vo to nahīñ ki ashk thame hī na aañkh se
nikle hai koī laḳht-e-dil ab sau jalā huā

hairān rañg bāġh-e-jahāñ thā bahut rukā
tasvīr kī kalī kī tarah dil na vā huā

aalam kī be-fizā.ī se tañg aa ga.e the ham
jaagā se dil gayā jo hamārā bajā huā

us ke ga.e pe dil kī ḳharābī na pochhiye
jaise kaso kā koī nagar ho luTā huā

bad-tar hai ziist marg se hijrān-e-yār meñ
bīmār dil bhalā na huā to bhalā huā

is hādisa-gāh-e-hastī meñ Takrā.eñge do dil kuchh bhī karo
pariyoñ ke liye vo laakh uḌeñ gulfām se bachnā mushkil hai

Dar hai ki shām-e-hijr meñ dil kā diyā bujhā na deñ
ab ke havā kī sāzisheñ shola-e-ārzū se haiñ

kaise aa pahuñchī hai gulshan kī havā zindāñ meñ
dil kā jau zaḳhm thā ik phuul banā zindāñ meñ

ai bachpane kī duniyā to yaad aa rahī hai
dil se mirī sadā-e-fariyād aa rahī hai

zaḳhm-e-dil ai zaḳhm-e-dil nāsūr kyuuñ bantā nahīñ
lutf to jab hai ki afsāne meñ afsāna rahe

ham ko vaa.iz kā bhī dil rakhnā hai saaqī kā bhī dil
ham to tauba kar ke bhī pāband-e-maiḳhana rahe

kartā hai bahut yaad shab-o-roz mirā dil
phūloñ ke nagar meñ rah-e-pur-ḳhār kā honā

chehre pe jo likhā hai vahī us ke dil meñ hai
paḌh lī haiñ surḳhiyāñ to ye aḳhbār pheñk de

dil kī rah jaa.e na dil meñ ye kahānī kah lo
chāhe do harf likho chāhe zabānī kah lo

lab par sukūt dil meñ udāsī nazar meñ ḳhauf
merā uruuj mujh ko ye sauġhāt de gayā

jo dekhnā ho kabhī dostoñ kā dil 'ahmad'
khare usuul kā pattā uchhāl kar dekho

majbūr bahut kartā hai ye dil to zabāñ ko
kuchh aisī hī hālat hai ki ham kuchh nahīñ kahte

masjid meñ tujh bhavoñ kī ai qibla-e-dil-o-jāñ
palkeñ haiñ muqtadī aur putlī imaam goyā