Tags-Dil

aap jaate to haiñ us bazm meñ 'shiblī' lekin
hāl-e-dil dekhiye iz.hār na hone paa.e

koī ajab sā pahlū hai jo dil meñ ghar kar jaatā hai
koī alag sī baat hai jo us kī har baat meñ hotī hai

ghar kā sannāTā to 'humairā' hañgāmoñ kī nazr huā
dil kī vīrānī vaisī kī vaisī ek zamāne se

jinheñ māntā hī nahīñ ye dil vahī log mere haiñ ham-safar
mujhe har tarah se jo raas the vahī log mujh se bichhaḌ ga.e

kyuuñ fanā se Dareñ baqā kyā hai
bujh gayā dil hī jab rahā kyā hai

ġham kī zamīñ pe āsmāñ baaqī rahā na ai miyāñ
dil kī ye sogvāriyāñ rū-ba-zavāl ab nahīñ

tere dil tak aa.uuñ maiñ
itnī to āsānī rakh

letā huuñ maktab-e-ġham-e-dil meñ sabaq hanūz
lekin yahī ki raft gayā aur buud thā

pūchhā thā garche yaar ne ahvāl-e-dil magar
kis ko dimāġh-e-minnat-e-guft-o-shunūd thā

but-ḳhāne se dil apne uThā.e na ga.e
ka.abe kī taraf mizāj laa.e na ga.e

mujhe in kohna aflākoñ meñ rahnā ḳhush nahīñ aatā
banāyā apne dil kā ham niiñ aur hī ek nau-mahlā

kiyā thā ġhair niiñ ham-rañg ho kar vasl kā saudā
tumhārā dekh mukh kā āftāb us kā to dil dahlā

kaf-e-pā yaar kā hai phuul kī pañkhuḌī se nāzuk-tar
mirā dil narm-tar hai us ke hote us se mat sahlā

raat din phir un se kar to ham-kalāmī guftugū
iiñT kā ik dil banā dīvār ko tasvīr kar

mirā dil mar gayā jis din ki nazzāre se baaz aayā
'yaqīñ' parhez agar kartā to ye bīmār behtar thā

jaane se dil ke kyuuñ na ho vīrān bazm-e-aish
shab bhar isī se rahtī thī bāteñ huzūr kī

talab-e-dard meñ dil had se guzartā kab thā
tum ne pūchhā thā ki aur is ne kahā aur sahī

merī betābi-e-dil chain na lene degī
terī ḳhāmosh tabī.at mujhe le Dūbegī

hue ho jāñ-ba-lab ab hogā kyā tamannā kā
jahāñ pe DhūñDte ho dil agar vahāñ na huā

nahīñ haiñ aañsū hī koī zabāñ mire dil kī
hai aisā ashk bhī āñkhoñ se jo ravāñ na huā