Tags-Dil

kahāñ kā vasl kaisī aarzū ai dil vo kahte haiñ
na maiñ hasrat karūñ puurī na tū armān paidā kar

hamārā intiḳhāb achchhā nahīñ ai dil to phir tū hī
ḳhayāl-e-yār se behtar koī mehmān paidā kar

ḳhayāl-e-zabt-e-ulfat hai to 'ahsan' phir ḳhatar kaisā
na dhaḌke dil bhī siine meñ vo itmīnān paidā kar

mat pūchh ki kyā guzrī dil-sho.ala-sifat par
is dast-e-hinā.ī meñ mirā dāman-e-tar dekh

tū us kā tamannā.ī hai mat Dar dil-e-nādāñ
ummīd nahīñ phir bhī vo kahtā hai to mar dekh

apne gird-o-pesh kā bhī kuchh patā rakh
dil kī duniyā to magar sab se judā rakh

mere ghar mehmān ho jaate
dil meñ tum aa ke jaan ho jaate

dil to kahtā hai lutf-e-vasl ye thā
jān-e-man merī jaan ho jaate

dil vo kāfir ki sadā aish kā sāmāñ māñge
zaḳhm pā jaa.e to kambaḳht namak-dāñ māñge

ham bhī kuchh apne dil kī girah kholne ko haiñ
kis kis kā aaj dekhiye band-e-qabā khule

raaj chhoḌā bādshāhat kī ummīdeñ tark kiiñ
ho gayā betāb dil rūh-e-haqīqat ke liye

mirā dil hai siine meñ raushnī isī raushnī pe madār hai
maiñ musāfir-e-rah-e-ishq huuñ to ye sham.a rāh-guzār hai

vaqt kaaTe na kaTtā thā kal tak mirā
dil hai masrūf jab se fidā ho gayā

aap se mil kar mile dil ko sukūn
aap kī maujūdgī kyā ḳhuub hai

aap ne paiġhām bhejā hai hameñ
aap kī ye dil-lagī kyā ḳhuub hai

dil hai rāz-o-ramz kī duniyā meñ shādāñ
aql ko har aan tashvīsh-e-ḳhabar hai

dil-e-āgāh meñ kyā kahiye 'jigar' kyā dekhā
lahreñ letā huā ik qatre meñ dariyā dekhā

koī shā.ista-o-shāyān-e-ġham-e-dil na milā
ham ne jis bazm meñ dekhā use tanhā dekhā

kisī se dil kā lagānā gunāh hai nāseh
jo ye qusūr hai to ye qusūr maiñ ne kiyā

tirā ḳhayāl mire dil meñ aa nahīñ saktā
ki jis ko duur kiyā us ko duur maiñ ne kiyā