Tags-Dil

ye to batlāo hameñ shahr basāne vaalo
dil kā vīrāna kab ābād kiyā jā.egā

ek hasrat-e-tāmīr dil meñ jo zarā sī thī Dar thā jaag uTThegī aur jaag uTThī hai
kaan khol kar sun lo tum mirā bayāñ yaaro ret is nagar kī hai iiñT is nagar kī hai

dil ke nagar meñ qaid haiñ chāhat kī bulbuleñ
vo mausam-e-bahār ke manzar nahīñ rahe

maiñ dil kī laash par nauha-kunāñ huuñ aur tū zālim
bulā kar shahr-dāroñ ko mirā chehra dikhātā hai

chāñd-tāroñ meñ jo ābād hue jaate haiñ
vo kisī dil meñ bhī ghar apnā banā kar dekheñ

mujhe vo sher kahne haiñ ki jin meñ dil dhaḌakte hoñ
maiñ naqlī phuul āñgan meñ kabhī bhī bo nahīñ saktī

aaj kuchh yuuñ shab-e-tanhā.ī kā afsāna chale
raushnī sham.a se dil dard se begāna chale

ham ne dāman na apnā bhigoyā 'hafīz'
dil meñ tūfān lākhoñ machalte rahe

jab se tire lahje meñ thakan bol rahī hai
dil meñ mire sūraj kī jalan bol rahī hai

kyuuñ dal ke dhaḌakne kī sadā ho ga.ī maddham
lagtā hai ki sāñsoñ meñ thakan bol rahī hai

aa jā.egā vo jis se hai milne kī tamannā
'mīnā' ye tire dil kī lagan bol rahī hai

dil agar kalīsā hai ġham shabīh-e-īsā hai
phuul rāhiba ban kar ruuh ne bikhere haiñ

dard Thahre to zarā dil se koī baat kareñ
muntazir haiñ ki ham apne se mulāqāt kareñ

tū jo is duniyā kī ḳhātir apnā-āp gañvātā hai
ai dil-e-man ai mere musāfir kaam hai ye nā-dānoñ kā

nahīñ thā koī bhī phir bhī thiiñ āhaTeñ kyā kyā
tamām-rāt huiiñ dil pe dastakeñ kyā kyā

na miT sake kisī sūrat bhī mere dil ke shokūk
tirī nigāh ne kī haiñ vazāhateñ kyā kyā

tamām valvale vo sard paḌ chuke ai 'arsh'
hamāre dil meñ thiiñ varna harārateñ kyā kyā

ā.īna-dil dāġh-e-tamannā ke liye thā
siine kā sadaf ik dur-e-yaktā ke liye thā

guzrā na tire ba.ad koī kūcha-e-dil se
ye rāsta ik naqsh-e-kaf-e-pā ke liye thā

dil meñ yahī ḳhalish rahe soz-e-nihāñ rahe
lekin mazāq-e-ishq-o-mohabbat javāñ rahe