Tags-Dil

surma-e-shams-o-qamar rāhat-e-chashm-e-nargis
dil-e-bīnā se hī kaifiyyat-e-fardā dekho

duniyā meñ chāk-dil ko nahīñ pūchhtā koī
kyā jaane kitne ahl-e-junūñ be-nishāñ rahe

dil ko us raah pe chalnā hī nahīñ
jo mujhe tujh se judā kartī hai

us ne dekhā hī nahīñ varna ye aañkh
dil kā ahvāl kahā kartī hai

mus.haf-e-dil pe ajab rañgoñ meñ
ek tasvīr banā kartī hai

vo dil ke uḌāne se vāqif na the
hamīñ to ye ghāteñ batāne lage

mire riyāz kā āḳhir asar dikhā.ī diyā
chhupā thā dil meñ jo naġhma mujhe sunā.ī diyā

dil-e-mezbān meñ rañj kā yahī muddatoñ se hai silsila
koī din meñ aa ke Thahar gayā koī raat rah ke chalā gayā

vazāhateñ to mohabbat meñ ham bhī karte magar
kitāb-e-dil kā hameñ koī hāshiya na milā

agar mile to use hāl-e-dil hī kah denā
phir us ke ba.ad vo tum se milā milā na milā

dil diyā hai to un ke qadmoñ par
zindagānī ko bhī nisār kareñ

kuchh hañsī khel sambhalnā ġham-e-hijrāñ meñ nahīñ
chāk-e-dil meñ hai mire jo ki garebāñ meñ nahīñ

dil de ke jafā sahiye aafat meñ phañse rahiye
daanā jo hameñ kahiye nādāñ kise kahte haiñ

dil kī jo zarā.at hai ḳhār-o-ḳhas-e-zahmat se
ik qatre kī hasrat hai bārāñ kise kahte haiñ

har-vaqt hai be-zārī har dam hai jafākārī
dil-jūī-o-dildārī-e-jānāñ kise kahte haiñ

muddat se hai dil barham sohbat se nahīñ mahram
āzād haiñ ghar se ham mehmāñ kise kahte haiñ

qissa-e-ġham bhī vahī maiñ bhī vahī dil bhī vahī
par vo pahlā sā ḳhulūs-e-dar-o-dīvār nahīñ

ayaañ kar dī har ik par ham ne apnī dāstān-e-dil
ye kis kis se chhupānī hai na tum samjhe na ham samjhe

jahāñ do dil mile duniyā ne kāñTe bo diye aksar
yahī apnī kahānī hai na tum samjhe na ham samjhe

tīr-e-nazar ne zulm ko ehsāñ banā diyā
tarkīb-e-dil ne dard ko darmāñ banā diyā