Tags-Dil

bhūlī nahīñ nasīb ke likkhe kī ḳhūbiyāñ
tahrīr lauh-e-dil pe hai sab mājrā-e-rañj

kyā ġham jo kū-e-yār meñ hotā huuñ pā.emāl
fart-e-ḳhushī se ḳhaak nahīñ dil meñ jaa.e rañj

dil-e-shā.ir ke naġhmāt hasīñ se
tire jalvoñ kī shohrat ho ga.ī hai

'jalīl' ab dil nahīñ miltā kisī se
ajiib apnī tabī.at ho ga.ī hai

haañ dil kī dhaḌkanoñ se sadā chhīn lo magar
chup-chāp hī jo aa ke yahāñ bas gayā koī

dil kī zabāñ bahut hai koī ho jo ahl-e-dil
hoñToñ se kyā batā.e bhalā mudda.ā koī

hairān ho ke dil se ye pūchhā nigāh ne
kyā vāqa.ī milā na tujhe āshnā koī

us sāda-dil ko kyā ḳhabar is ūñch-nīch kī
'anjum' ke paas jā ke bane kyā baḌā koī

tire darīche se hai duur merā darvāza
agar tū dard hai merā to dil ke baab meñ aa

ulfat unkī nahīñ chhoḌī jaatī
haal dil kā nahīñ dekhā jaatā

aap ke armāñ ko dil se khīñch kar bāhar kiyā
ab kahāñ jā.eñge ye shaitān rahne ke liye

shabnam se likhūñ ashkoñ se likhūñ maiñ dil kī kahānī kaise likhūñ
phūloñ pe likhūñ hāthoñ pe likhūñ hoñToñ kī zabānī kaise likhūñ

kyuuñ ret pe DhūñDhte phirte ho ab haath na aa.egā ye sarāb
ye baat haqīqat hai lekin maiñ dil kī zabānī kaise likhūñ

haiñ dil kī bāteñ yuuñ to bahut kuchh kahnā hai kuchh sunñā hai
is kāġhaz ke ek TukḌe par maiñ apnī kahānī kaise likhūñ

ab to us phuul kī nik.hat se mahaktī hai hayāt
zaḳhm-e-dil zaḳhm thā tahzīb-e-nazar hone tak

dil hī jalne do shab-e-ġham jo nahīñ koī charāġh
kuchh ujālā to rahe ghar meñ sahar hone tak

umiid hī to dil-shajar kī āḳhirī asaas thī
shagūfa ye bhī ho gayā ḳhizāñ se pā.emāl kyā

terī qindīl hai tirā dil
tū aap hai apnī raushnā.ī

na kyuuñ dil se bāteñ kareñ ham musalsal
yahī ek monis yahī ek hamdam

batā tū dil ke bachāne kī koī raah bhī hai
tirī nigāh kī nāvak-fagan panāh bhī hai