Tags-Dil

tulū-e-sub.h kī kirneñ bahut hī ḳhuub haiñ lekin
jamāl-e-shahr-e-dil vaqt-e-sahar kuchh aur hotā hai

masā.ib kis ko kahte haiñ tumhīñ jaano tumhīñ samjho
jahāñ vaalo hamārā dil jigar kuchh aur hotā hai

dil-o-nazar meñ na paidā huī shakebā.ī
kisī ke ġham ne tabī.at hazār bahlā.ī

chalo kahīñ pe ta.alluq kī koī shakl to ho
kisī ke dil meñ kisī kī kamī ġhanīmat hai

hosh-mandoñ ne sajā lī ġham-e-dil kī mahfil
ham se dīvāne sar-e-anjuman-e-dār aa.e

marīz-e-ishq ko hai dard-e-dil davā ke liye
rahī ġhizā so hai ḳhūn-e-jigar ġhizā ke liye

na kyūñki jaan de dil sadma-e-jigar sun kar
hamesha dete haiñ jaañ yaarī āshnā ke liye

jafā-e-charḳh-o-sitam-hā-e-ġhair-o-hasrat-o-ġham
ye jhagḌe jaan ko mol un se dil lagā ke liye

tum apnā dil liye phirte ho us ne lākhoñ dil
isī tarah se haiñ bāteñ banā banā ke liye

chaah meñ us kī dil ne hamāre naam ko chhoḌā naam kiyā
shaġhl meñ us ke shauq baḌhā kar kaam ko chhoḌā kaam kiyā

zulf dupaTTa dhānī maiñ kar ke pinhāñ mirā dil bāñdh liyā
said na khāve kyūñ-kar jal jab sabze meñ pinhāñ daam kiyā

ram par apne āhū-e-dil ko ġhurra nihāyat thā lekin
chanchal āhū-e-chashm ne us ko ek nigah meñ raam kiyā

samjhe the yuuñ ham dil ko lagā kar pāveñge yaañ ārām bahut
haif usī fahmīd ne ham ko kyā kyā be-ārām kiyā

rañg-e-ġhazal meñ dil kā lahū bhī shāmil ho
ḳhanjar jaisā bhī ho lekin qātil ho

is tasvīr kā aab o rañg nahīñ badlā
jaane kab ye dil kā naqsh bhī bātil ho

āsār nahīñ koī magar dil ko yaqīñ hai
ghar hogā kabhī vādī-e-mahtāb kī sūrat

aur kuchh der meñ jab phir mire tanhā dil ko
fikr aa legī ki tanhā.ī kā kyā chāra kare

shola-e-dard jo pahlū meñ lapak uTThegā
dil kī dīvār pe har naqsh damak uTThegā

dil se phir hogī mirī baat ki ai dil ai dil
ye jo mahbūb banā hai tirī tanhā.ī kā

ham rāz-e-dil chhupāte magar apnī zindagī
puurī khulī kitāb agar ho to kyā kareñ