Tags-Aankh

adh-bune ḳhvāboñ kā ambār paḌā hai dil meñ
aañkh vāloñ ke liye hai ye amānat merī

ajab fusūn-e-ḳharīdār kā asar hai ki ham
usī kī aañkh se apne hunar ko dekhte haiñ

tumhārī yaad kī shiddat meñ bahne vaalā ashk
zamīñ meñ bo diyā jaa.e to aañkh ug aa.e

koī ilzām jalvoñ pe aayā nahīñ
bebasī aañkh kī mushtahar ho ga.ī

dar-ba-dar be-pairahan thā ḳhvāb-e-ishq
maiñ ne us ko aañkh pahnā.ī to thī

aañkh meñ hirnoñ kī ḳhāk-afgan hai us kī gard-e-rāh
tispe gardan-kash haiñ pī ke chashm-e-jādū se che-ḳhush

har ek titlī pe bār-e-ġham hai aur andalīboñ kī aañkh nam hai
jahāñ pe ab ḳhaak uḌ rahī hai yahīñ kahīñ gulistāñ thā pahle

ab koī aañkh nam nahīñ hotī
dil kī duniyā meñ ḳhushk saal hai ye

diloñ ko toḌne vaalo tumheñ kisī se kyā
milo to aañkh churā lo tumheñ kisī se kyā

ye jo manzar tire aage se saraktā hī nahīñ
is meñ shāmil hai tirī aañkh kī hairānī bhī

ḳhanjar-o-teġh kar gale pe ravāñ
pher kar aañkh kaj na chitvan kar

bazm meñ vo nahīñ uThāte aañkh
dekhnā nāgavār hai kis kā

aañkh bhī apnī sarāb-ālūd hai
aur is dariyā meñ paanī bhī nahīñ

aa.ine kī aañkh meñ ab ke baras
koī aks-e-mehrbānī bhī nahīñ

jab aañkh us sanam se laḌī tab ḳhabar paḌī
ġhaflat kī gard dil se jhaḌī tab ḳhair paḌī

yuuñ hī hai nuur vahdat kā dil-e-insāñ meñ aa jaanā
ki jaise aañkh ke til meñ jahāñ-bhar kā samā jaanā

kisī kī aañkh meñ ḳhud ko talāsh karnā hai
phir us ke ba.ad hameñ ā.inoñ se Darnā hai

kahānī ko mukammal jo kare vo baab uThā laa.ī
maiñ us kī aañkh ke sāhil se apne ḳhvāb uThā laa.ī

dil to saada hai terī har baat ko sachchā māntā hai
aql ne bāteñ karte terā aañkh churānā dekhā hai

uTh rahī hai vo aañkh ruk ruk kar
qatl maiñ ho rahā huuñ qistoñ meñ