yuuñ hī hai nuur vahdat kā dil-e-insāñ meñ aa jaanā
ki jaise aañkh ke til meñ jahāñ-bhar kā samā jaanā
na lete naam bhī vo zulm kā bhūle se duniyā meñ
agar itnā samajh lete ki hai pesh-e-ḳhudā jaanā
ye fitrat husn kī hai aur vo tīnat mohabbat kī
jise tum ne jafā samjhā use ham ne vafā jaanā
bayāñ kar denā hāl-e-zār ham sahrā-nashīnoñ kā
agar kūche meñ is zālim ke o bād-e-sabā jaanā
mile fursat agar tum ko to ba.ad marg dam-bhar ko
barā-e-fātiha bekas kī turbat par bhī aa jaanā
na samjhī tum ne kuchh hastī hamārī ishq meñ lekin
tumheñ apne se bhī ham ne sivā samjhā sivā jaanā
haqīqat meñ vahī manzil-shanās-e-rāh-e-irfāñ hai
ki jis ne apnī har ik saañs ko bāñg-e-darā jaanā
samajhtā koī jīte-jī to haañ ik baat thī 'sho.ala'
mire marne pe duniyā ne mujhe jaanā to kyā jaanā