Tags-Aangan

sukūt-e-shab ne dikhlā.e na.e taare tamannā ke
unheñ āñgan meñ laane kī koī tadbīr karte haiñ

jalātā huuñ mohabbat ke diye nafrat ke āñgan meñ
nazar rakhtā huuñ dushman par har ik shorish se Dartā huuñ

dhuup musāfir chhāñv musāfir aa.e koī koī jaa.e
ghar meñ baiThā soch rahā huuñ āñgan hai yā rasta hai

sūratoñ ke shahr meñ rauzan hī rauzan dekh kar
ghar meñ aa baiThe kushāda ghar kā āñgan dekh kar

ab bhī suune man-āñgan meñ yaad ke panchhī uḌte haiñ
ab bhī shāmeñ sajtī haiñ yaañ ab bhī melā lagtā hai

tere āñgan se utartī chāñdnī ne ab talak
ḳhauf baḳhshā siskiyāñ diiñ aur mujh ko Dar diyā

an-sune ek bulāve ne ujāḌe āñgan
barkateñ uTh ga.iiñ sab maaoñ ke pīchhe pīchhe

aaj aur kal kī baat nahīñ hai sadiyoñ kī tārīḳh yahī hai
har āñgan meñ ḳhvāb haiñ lekin chand gharoñ meñ ta.abīreñ haiñ

phir yuuñ hai ki sūraj ko nahīñ jāntā vo shaḳhs
jis ne mire āñgan kā añdherā nahīñ dekhā

chāñd utrā thā shab ko āñgan meñ
niiñd TuuTe to ḳhvāb se nikle

āñgan meñ tulsī lahrātī
naanī shaam meñ battī jalātī

maiñ apne āñgan meñ khoyā khoyā sā
āhista āhista ghultā jaatā huuñ

ḳhamoshī ke haiñ āñgan aur sannāTe kī dīvāreñ
ye kaise log haiñ jin ko gharoñ se Dar nahīñ lagtā

isī ko taan kar ban jā.egā ghar
bichhā leñge to khil uTThegā āñgan

mere suune āñgan meñ 'sajjād' mirī parchhā.īñ hai
kis kī bholī soch kā paañv aise meñ dar aatā hai

vo din bhī ab kuchh duur nahīñ jab sayyāre hoñge āñgan
ai sub.h-e-vatan ai sub.h-e-vatan

dil kā dilbar jab se dil kī dhaḌkan hone vaalā hai
suunā suunā merā āñgan gulshan hone vaalā hai

saarī galī sunsān paḌī thī bād-e-fanā ke pahre meñ
hijr ke dālān aur āñgan meñ bas ik saaya zinda thā

jitne hañgāme the sūkhī Tahniyoñ se jhaḌ ga.e
peḌ par phal bhī nahīñ āñgan meñ patthar bhī nahīñ

lo vo bhī gir gayā mire āñgan kā peḌ aaj
har vaqt jis se aasrā taaza havā kā thā