ab soch rahe haiñ yahāñ kyā kyā nahīñ dekhā
nikle jo tirī samt to rasta nahīñ dekhā
tū ne kabhī āñkhoñ se bahā.e nahīñ aañsū
tū ne kabhī dariyāoñ ko bahtā nahīñ dekhā
phir yuuñ hai ki sūraj ko nahīñ jāntā vo shaḳhs
jis ne mire āñgan kā añdherā nahīñ dekhā
karte haiñ bahut baat ye vīrānī-e-dil kī
un logoñ ne shāyad mirā huliya nahīñ dekhā
go gardish-e-daurāñ meñ haiñ din-rāt magar yaañ
hai aisī siyāhī ki saverā nahīñ dekhā
us shaḳhs ko aayā nahīñ milne kā salīqa
us shaḳhs ne is saal bhī mela nahīñ dekhā