milan rut ke hasīñ sapne zarā ta.abīr karte haiñ
chalo in chāñd tāroñ ko yūñhī tasḳhīr karte haiñ
banā kar chāñd ko kashtī utar jaa.eñ kināre par
bhulā Dāleñ sabhī sadmāt jo dil-gīr karte haiñ
sabhī bāteñ sabhī qisse sabhī dukh bhuul kar apne
na.e qisse na.ī ġhazleñ koī tahrīr karte haiñ
jo lafzoñ aur ma.ānī se bahut hai māvarā pyāre
hai abjad se jo aage vo vafā tafsīr karte haiñ
bahut muñh-zor haiñ dekho nikal jaa.eñ na hāthoñ se
chalo uḌte hue lamhe yahīñ zanjīr karte haiñ
hasad kī aag ke sho.ale jo bhaḌkāte haiñ ai logo
jalāte haiñ ḳhud apnī jaañ jo ye taqsīr karte haiñ
shikārī nafs baiThā hai bichhā kar jaal har lamha
chalā kar tiir taqve ke use naḳhchīr karte haiñ
sukūt-e-shab ne dikhlā.e na.e taare tamannā ke
unheñ āñgan meñ laane kī koī tadbīr karte haiñ
rupahlī shaam ho yā hoñ savere arġhavānī se
'shafaq' rañgoñ ke sab manzar mujhe tasḳhīr karte haiñ