Tags-Barish

aañsū jo rukā vo kisht-e-jāñ meñ
bārish kī misāl aa gayā hai

der tak saath bhīge ham us ke
ham ne yuuñ kāmyāb kī bārish

hāl-e-dil kahne ko bārish kī zarūrat hai mujhe
aur mere ghar havā ke dosh par aatā hai vo

aisī bārish kī zamīñ ġharq huī jaatī hai
abr kuchh vaqt to de detā sambhalne ke liye

vo haath kyā hue ta.amīr rā.egāñ niklī
makān gir ga.e mausam kī pahlī bārish meñ

bārish-e-kaif-o-tarannum kā samāñ kyā kahiye
naġhma jaise lab-e-mutrib se chuā kartā hai

pūchh bārish se vo hañste hue roī kyoñ hai
mausam us ne to nasha-bār zarā karnā thā

suḳhan-tarāz ho jab vo to aisā lagtā hai
diloñ pe nuur kī bārish hai guftugū kyā hai

shauq ke dasht kho ga.e shahr sarāb ho ga.e
bārish-e-zar huī bahut halqa-e-tishnagāñ bujhā

kabhī to matl.a-e-dil se ho itnī bārish-e-ashk
ki tum bhī khul ke baraste hue khare ho jaao

tum jo hote to baat kuchh hotī
ab ki bārish to sarf paanī hai

jin āñkhoñ se rañgoñ vaalī bārish kā ik va.ada thā
vo āñkheñ to miTTī ho ga.iiñ sub.h-o-shām ke chakkar meñ

pahlī bārish hī meñ taqvā ke nishāñ sab dhul ga.e
sar meñ ik TuuTā huā mazlūm sajda rah gayā

kabhī kabhī aatī thī pahle vasl kī lazzat andar tak
bārish tirchhī paḌtī thī to kamra giilā hotā thā

vaadī meñ ghūmtā huā bārish kā jal-tarañg
sāñsoñ meñ gūñjtā huā ik an-kahī kā bhed!

kuchh to vo bhīgtī hai bārish meñ
kuchh havā bhī use sañvārtī hai

dast-e-ġhaib kī tarah chhupā hai zulm kā haath sitam kā vaar
ḳhushk lahū kī bārish dekhī ham ne kūcha-e-barzan meñ

josh-e-bārish hai abhī thamte ho kyā ai ashko
dāman-e-koh-o-bayābāñ ko to bhar jaane do

ai mire abr-e-karam dekh ye vīrāna-e-jāñ
kyā kisī dasht pe tū ne kabhī bārish nahīñ kī

hamrah-e-mausam safar kī bastiyoñ ke darmiyāñ
naqsh-bar-dīvār bārish kī vasiyyat se na Dar