Fasih Akmal

jo tu nahin hai to lagta hai ab ki tu kya hai

Fasih Akmal

Shahjahanpur, Uttar pradesh, India

1944
jo tū nahīñ hai to lagtā hai ab ki tū kyā hai
tamām ālam-e-vahshat ye chaar sū kyā hai
kisī kī yaad meñ āñkheñ chhalaktī rahtī haiñ
to aur maslak-e-ushshāq meñ vuzū kyā hai
udaas kar gayā ye kaun masnad-e-gul ko
ye shor o shain hai kaisā ye hā-o-hū kyā hai
tire huzūr bhī apne hī mas.aloñ meñ rahe
samajh na paa.e ki āñkhoñ ke rū-ba-rū kyā hai
suḳhan-tarāz ho jab vo to aisā lagtā hai
diloñ pe nuur kī bārish hai guftugū kyā hai
har ek aañkh meñ aañsū har ek lab pe fuġhāñ
ye ek shor-e-qayāmat sā kū-ba-kū kyā hai
Top Urdushayar.com