Tags-Barish

kachchī dīvāroñ ko paanī kī lahar kaaT ga.ī
pahlī bārish hī ne barsāt kī Dhāyā hai mujhe

ye bārish kab rukegī kaun jaane
kahīñ maiñ mar na jā.ūñ tishnagī se

kabhī bārish kabhī garmī kabhī sardī zarūrī hai
kisī ko 'sād' mausam ek se achchhe nahīñ lagte

huiiñ āñkheñ ajab behāl ab ke
ye bārish kar ga.ī kañgāl ab ke

bārish-e-ashk meñ bah jā.egā ab shahr kā shahr
aaj 'āfāq' koī chiiz parā.ī huī hai

roz-e-azal dīvār pe merī bārish ke harfoñ se likhā thā
tere naam likhe jā.eñge jo sailāb likhe jā.eñge

ThanDe mausam se bhī maiñ jal jaatā huuñ
sūkhī bārish meñ bhī aksar bhīgā maiñ

vo jamāl kī tābish jaise nuur kī bārish
husn-e-yār kī yūrish aur mirī nazar tanhā

dil bhī dāman hai phailāo sar-e-shab
motī sī bārish barsāo sar-e-shab

bārish-e-sañg ho shīshe kī kamīñ-gāhoñ se
kaise farzāne ho shīshe kā makāñ kuchh bhī nahīñ

us kī sadā se gūñge lamhe paa.el jaise bajte haiñ
bachchoñ jaisā ḳhush hotā huuñ jab bhī bārish hotī hai

vo sho.aloñ kī bārish karne vaalā hai
ham kāġhaz ke ḳhol banā.e baiThe haiñ

ye zard pattoñ kī bārish mirā zavāl nahīñ
mire badan pe kisī dūsre kī shaal nahīñ

har pattī bojhal ho ke girī sab shāḳheñ jhuk kar TuuT ga.iiñ
us bārish hī se fasl ujḌī jis bārish se tayyār huī

kuchh aur baḌh ga.ī bārish meñ bebasī apnī
na baam se na kisī kī galī se guzrā huuñ

dhartī meñ jaḌeñ gaaḌ ke sar apnā uThā.e
bārish ke tasavvur meñ harī ghaas hai zinda

har buuñd shikasta bām-o-dar par
bārish kā itaab likh rahī thī

zarā bārish barastī hai shagūfe jaag uThte haiñ
ka.ī rañgoñ kī ḳhushbū se darīche jaag uThte haiñ

bārish ne mirī TuuTī huī chhat nahīñ dekhī
āñgan meñ lagī aag to bādal nahīñ barse

zarā sī der ko bārish rukī thī shāḳhoñ par
mizāj-e-sosan-o-sarv-o-saman badalne lagā