Tags-Awaz

maiñ apnī zaat kī tashrīh kartā phirtā thā
na jaane phir kahāñ āvāz kho ga.ī merī

masīhā jā rahā hai dauḌ kar āvāz do 'muztar'
ki dil ko dekhtā jā jis meñ chhāle paḌte jaate haiñ

khil uThegā har konā
tere andar kī āvāz se

mahsūs kiyā dard ke har ruup meñ us ko
āvāz kā afsūñ kabhī jhūTā to na niklā

ḳhāmoshī ke sahrāoñ meñ bhaTke hue sañgīt na jaano
tār-e-nafas ke naġhme haiñ ye in ko mirī āvāz na samjho

jaane do in naġhmoñ ko āhañg-e-shikast-e-sāz na samjho
dard-bharī āvāz to sun lo dard-bharī āvāz na samjho

duniyā maiñ tire saath abhī chal na sakūñgā
kuchh baaqī abhī zarf kī āvāz hai mujh meñ

koī āvāz TūTne kī nahīñ
dil meñ ik baat hai ḳhalā ya.anī

ḳhāmosh rah ki phir tirī āvāz sun sakūñ
nazroñ se duur jā ki tujhe dekh pā.ūñ maiñ

ab kyā karūñ ki shor meñ āvāz dab ga.ī
maiñ us ko shahr-e-jāñ meñ pukārā kiyā bahut

unheñ to karbalā kī tishnagī āvāz detī thī
vo dariyā the unheñ shahr-e-madīna chhoḌ denā thā

toḌo na hamāre liye āvāz kā āhañg
ham log to ik Dūbte lamhe kī fuġhāñ haiñ

us ġhairat-e-nāhīd kī har taan hai dīpak
sho.ala sā lapak jaa.e hai āvāz to dekho

tere altāf se raqsāñ haiñ laboñ par ḳhushiyāñ
ġham meñ Duubī huī āvāz kahāñ se lā.ūñ

gungunātī huī āvāz kahāñ se lā.ūñ
terī āvāz kā andāz kahāñ se lā.ūñ

merī fitrat hai gosh bar āvāz
sun rahā huuñ navā-e-mehram kyā

jab vāhime āvāz kī buniyād se nikle
ghabrā.e hue ham suḳhan-ābād se nikle

sālik ko yahī jaade se āvāz hai aatī
pāmāl jo ho raah vo manzil kī nikāle

dabegī kab talak āvāz-e-ādam ham bhī dekheñge
rukeñge kab talak jazbāt-e-barham ham bhī dekheñge

naġhma vo kis ne chheḌā hai bichhḌe hue ġham sab aan mile
āvāz kī lahroñ par larzāñ sau mohr-ba-lab tasvīreñ haiñ