mire armān māyūsī ke paale paḌte jaate haiñ
tumhārī chaah meñ jiine ke laale paḌte jaate haiñ
udhar us kī sharārat jis ne ġham kī aag sulgā dī
idhar merā kaleja jis meñ chhāle paḌte jaate haiñ
mire un ke ta.alluq par koī ab kuchh nahīñ kahtā
ḳhudā kā shukr sab ke muñh meñ taale paḌte jaate haiñ
ġham-e-nākāmī-e-koshish se hālat bigḌī jaatī hai
kaleje meñ yahāñ be-āg chhāle paḌte jaate haiñ
hamārā dard āh-e-dil mazā detā hai uḌ uḌ kar
tumhāre chāñd se chehre pe haale paḌte jaate haiñ
masīhā jā rahā hai dauḌ kar āvāz do 'muztar'
ki dil ko dekhtā jā jis meñ chhāle paḌte jaate haiñ