dabegī kab talak āvāz-e-ādam ham bhī dekheñge
rukeñge kab talak jazbāt-e-barham ham bhī dekheñge
dar-e-zindāñ se dekheñ yā urūj-e-dār se dekheñ
tumheñ rusvā sar-e-bāzār-e-ālam ham bhī dekheñge
ye zo.am-e-quvvat-e-faulād-o-āhan dekh lo tum bhī
ba-faiz-e-jazba-e-īmān-e-mohkam ham bhī dekheñge
mukāfāt-e-amal tārīḳh-e-insāñ kī rivāyat hai
karoge kab talak nāvak farāham ham bhī dekheñge
ye hañgām-e-vidā-e-shab hai ai zulmat ke farzando
sahar ke dosh par gulnār parcham ham bhī dekheñge