Tags-Tamanna

palak fasāna sharārat hijāb tiir duā
tamannā niiñd ishāra ḳhumār saḳht thakī

sādgī-hā-e-tamannā ya.anī
phir vo nairañg-e-nazar yaad aayā

kaheñ kis muñh se apnā ā.īna-bardār rahne deñ
tamannā hai ġhulāmī meñ hameñ sarkār rahne deñ

tamannā hai ki sarsayyad banūñ yā 'shiblī'-o-'hālī'
ki in arbāb-e-mahfil kī abhī tak hai jagah ḳhālī

tamannā hai ki duniyā mujh se yaksar nuur ho jaa.e
ye tārīkī simaT kar ek din kāfūr ho jaa.e

tamannā hai jahān-e-ilm meñ chamkūñ sahā ban kar
jumūd-e-zulmat-e-hastī pe chhā jā.ūñ ziyā bin kar

ba-qadr-e-zauq takmīl-e-tamannā kī tamannā hai
isī āġhosh meñ me.arāj-e-fardā kī tamannā hai

naqāb ulaT de jo baḌh kar ruḳh-e-tamannā se
ye aarzū hai ki mujh ko vo tishnagī denā

sūraj ko hathelī pe lakīroñ kī tamannā
ab chāñd kī thālī meñ kiran hai na diyā hai

dil-e-āshiq meñ hasrat bhī hai armāñ bhī tamannā bhī
vo jis bastī meñ rahte haiñ baḌī ābād bastī hai

nigāhoñ se milātā huuñ nigāheñ is tamannā meñ
vo mere dil meñ aa jaa.e jo un āñkhoñ meñ mastī hai

dil-e-jūñ-sham.a bahr-e-dāvat-e-nazzāra lāya.anī
nigah labrez-e-ashk o siina ma.amūr-e-tamannā ho

luTāte haiñ vo bāġh-e-ishq jaa.e jis kā jī chāhe
gul-e-dāġh-e-tamannā luuT laa.e jis kā jī chāhe

aane se tire rañg badal degī tamannā
alfāz badal jā.eñge ai dost duā ke

dil meñ mere pal rahī hai ye tamannā aaj bhī
ik samundar pī chukūñ aur tishnagī baaqī rahe

ḳhayāl meñ ik na ik maze kī na.ī kahānī hai aur ham haiñ
abhī tamannā hai aur dil hai abhī javānī hai aur ham haiñ

na.ī rutoñ ke jhamele hoñ us kā zād-e-safar
shikast-e-arz-e-tamannā pe gungunā.ūñ maiñ

ik taraf hājat kī shiddat ik taraf ġhairat kā josh
nutq par harf-e-tamannā dil meñ ġhusse kā ḳharosh

savād-e-shām-e-mohabbat hai dūd-e-be-ātish
tulū-e-sub.h-e-tamannā hai ātish-e-be-dūd

ro ke us shoḳh se qāsid mirā ronā kahnā
hañs paḌe us pe to phir harf-e-tamannā kahnā