Tags-Aurat

ilm se har chand tujh ko kam kiyā hai bahra-mand
lekin is se ho na ai ma.asūm aurat dard-mand

duḳhtaran-e-maġhribī ko de na aurat kā ḳhitāb
ye mujassam ho ga.e haiñ kuchh gunahgāroñ ke ḳhvāb

itnī jaldī mazdūr aurat āḳhir ye gale meñ bāñheñ kyuuñ
le der huī ab bhaag bhī jā bas itnī mohabbat kaafī hai

yaad rakh dil par na hone paa.e aurat kā asar
muskurā.e bhī agar āñkhoñ meñ āñkheñ Daal kar

kyā kabhī aurat kā nazzāra bhī kar saktā huuñ maiñ
kyā kabhī is raah se āsāñ guzar saktā huuñ maiñ

guftugū ye ḳhatm hone bhī na paa.ī thī abhī
ek aurat god meñ bachcha liye dāḳhil huī

achchhī-ḳhāsī rusvā.ī kā sabab hotī hai
dūsrī aurat pahlī jaisī kab hotī hai

ek āvāz aa.ī ki aurat huuñ maiñ
barq huuñ zalzala huuñ qayāmat huuñ maiñ

muddatoñ chāñd-tāroñ meñ paalā gayā
phir vo aurat ke sāñche meñ Dhālā gayā

log aurat kī har ik chīḳh ko naġhma samjhe
vo qabīloñ kā zamāna ho ki shahroñ kā rivāj

log aurat ko faqat jism samajh lete haiñ
ruuh bhī hotī hai us meñ ye kahāñ sochte haiñ

mat jāniye paikār meñ bas nāz-o-adā kā
aurat meñ hai dam ma.arka-e-jaur-o-jafā kā

batā.ūñ kyā tujhe ai ham-nashīñ kis se mohabbat hai
maiñ jis duniyā meñ rahtā huuñ vo is duniyā kī aurat hai

qissa-e-ādam meñ ek aur hī vahdat paidā kar lī hai
maiñ ne apne andar apnī aurat paidā kar lī hai

vo maañ ho bahan biivī yā ki beTī ho suno logo
har ik kirdār meñ rakkhā gayā ġham-ḳhvār aurat ko

mujhe us vaqt 'arshad' kyoñ mirī maañ yaad aatī hai
kisī kuTiyā meñ dekhūñ jab kisī lāchār aurat ko

banāyā hai musavvir ne hasīñ shahkār aurat ko
alag pahchān detā hai kahānī-kār aurat ko

salām un auratoñ par jo ki maa.eñ haiñ shahīdoñ kī
salāmī pesh kartā huuñ maiñ sau sau baar aurat ko

usī kā ruup dhāre phir rahī haiñ kuchh chuḌeleñ bhī
maiñ aurat hī nahīñ kahtā kisī makkār aurat ko

phir ik din un kī qismat meñ likhī jaatī hai rusvā.ī
zamāne meñ samajhte haiñ jo kārobār aurat ko