log aurat ko faqat jism samajh lete haiñ
ruuh bhī hotī hai us meñ ye kahāñ sochte haiñ
ruuh kyā hotī hai is se unheñ matlab hī nahīñ
vo to bas tan ke taqāzoñ kā kahā mānte haiñ
ruuh mar jaate haiñ to ye jism hai chaltī huī laash
is haqīqat ko na samajhte haiñ na pahchānte haiñ
kitnī sadiyoñ se ye vahshat kā chalan jaarī hai
kitnī sadiyoñ se hai qaa.em ye gunāhoñ kā rivāj
log aurat kī har ik chīḳh ko naġhma samjhe
vo qabīloñ kā zamāna ho ki shahroñ kā rivāj
jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ
ham jo insānoñ kī tahzīb liye phirte haiñ
ham sā vahshī koī jañgal ke darindoñ meñ nahīñ
ik bujhī ruuh luTe jism ke Dhāñche meñ liye
sochtī huuñ maiñ kahāñ jā ke muqaddar phoḌūñ
maiñ na zinda huuñ ki marne kā sahārā DhūñDūñ
aur na murda huuñ ki jiine ke ġhamoñ se chhūTūñ
kaun batlā.egā mujh ko kise jā kar pūchhūñ
zindagī qahr ke sāñchoñ meñ Dhalegī kab tak
kab talak aañkh na kholegā zamāne kā zamīr
zulm aur jabr kī ye riit chalegī kab tak