Tags-Aurat

itnī jaldī mazdūr aurat āḳhir ye gale meñ bāñheñ kyuuñ
le der huī ab bhaag bhī jā bas itnī mohabbat kaafī hai

qissa-e-ādam meñ ek aur hī vahdat paidā kar lī hai
maiñ ne apne andar apnī aurat paidā kar lī hai

patthar maar ke chaurāhe par ik aurat ko maar diyā
sab ne mil kar phir ye sochā us ne ġhalatī kyā kī thī

jis ko tum kahte ho ḳhush-baḳht sadā hai mazlūm
jiinā har daur meñ aurat kā ḳhatā hai logo

achchhī-ḳhāsī rusvā.ī kā sabab hotī hai
dūsrī aurat pahlī jaisī kab hotī hai

be-vaj.h tahaffuz kī zarūrat bhī nahīñ hai
aisī mire andar koī aurat bhī nahīñ hai

yaad rakh dil par na hone paa.e aurat kā asar
muskurā.e bhī agar āñkhoñ meñ āñkheñ Daal kar

kyā kabhī aurat kā nazzāra bhī kar saktā huuñ maiñ
kyā kabhī is raah se āsāñ guzar saktā huuñ maiñ

guftugū ye ḳhatm hone bhī na paa.ī thī abhī
ek aurat god meñ bachcha liye dāḳhil huī

go mujhe ehsās-e-tanhā.ī rahā shiddat ke saath
kaaT dī aadhī sadī ek ajnabī aurat ke saath

suunā āñgan tanhā aurat lambī umr
ḳhālī āñkheñ bhīgā āñchal giile hoñT

baat ye hai ki bayāñ kaise karūñ
ek aurat bhī chhupī hai mujh meñ

aurat ne janam diyā mardoñ ko mardoñ ne use bāzār diyā
jab jī chāhā maslā kuchlā jab jī chāhā dhutkār diyā

maiñ ki aurat huuñ mirī sharm hai merā zevar
bas taḳhallus isī baa.is to 'hayā' rakkhā hai

siyāsat ke chehre pe raunaq nahīñ
ye aurat hamesha kī bīmār hai

aurat se bahs karnā samajhtā thā bas hatak
aur nazriyātī laḌkī bhī dil meñ basā.ī thī

jis kī āñkhoñ meñ sharārat thī vo mahbūba thī
ye jo majbūr sī aurat hai ye ghar vaalī hai

mujh meñ ehsās kyuuñ ho ki aurat huuñ maiñ
zindagī kyuuñ lagūñ? bas zarūrat huuñ maiñ

maiñ aurat thī sharīk-e-taḳht kab thī
so malika kah ke bulvā.ī ga.ī huuñ

aurat huuñ magar sūrat-e-kohsār khaḌī huuñ
ik sach ke tahaffuz ke liye sab se laḌī huuñ