Tags-Shama

sham.a kī lau par jalte dekhā raat jo ik parvāne ko
saarī kahānī maazī kī vo apnī zabānī yaad aa.ī

sham.a har shaam tere rone par
sub.h-dam tak charāġh hañstā hai

sub.h-dam rotī jo terī bazm se jaatī hai sham.a
saaf mere soz-e-ġham kā rañg dikhlātī hai sham.a

parda-e-fānūs se bāhar nahīñ rakhtī qadam
rū-ba-rū tere ruḳh-e-raushan ke sharmātī hai sham.a

kārband-e-adl hote haiñ jo haiñ raushan-dimāġh
bazm meñ har samt yaksāñ nuur pahuñchātī hai sham.a

gher lete haiñ tujhe parvāne us ko chhoḌ kar
jis meñ tū ho kab faroġh us bazm meñ paatī hai sham.a

sirf parvāna adab se dam-ba-ḳhud rahtā nahīñ
tere ro.ab-e-husn se mahfil meñ tharrātī hai sham.a

jis tarah kaale ke man ke rū-ba-rū gul ho charāġh
dekh kar ta.avīz-e-zulf-e-yār bujh jaatī hai sham.a

jā-e-girya sohbat-e-ahle--tamāshā hai 'asar'
hai bajā rotī huī jo bazm meñ aatī hai sham.a

parvāne aa hī jā.eñge khiñch kar ba-jabr-e-ishq
mahfil meñ sirf sham.a jalāne kī der hai

tasadduq un pe hotā huuñ jo sho.ale dil se uThte haiñ
basar kartā huuñ maiñ parvāna-e-sham-e-fuġhāñ ho kar

gul hazāroñ meñ sham.a-e-aish 'ehsāñ'
jaise us gul ko dil diyā maiñ ne

havāoñ ko dayār-e-dil kī raat sauñp dī ga.ī
badan ko sham-e-nā-tavāñ kā haal de diyā gayā

yaaro na charāġh aur na maiñ sham.a huuñ lekin
har shaam ko jaltā huuñ jalā.e se kasū kī

vo sham.a ban ke ḳhud hī akele jalā kiyā
parvāne kal kī raat pareshān se ga.e

tishnagī kī tafsīreñ misl-e-sham.a haiñ 'vāmiq'
jo zabān khultī hai us se lau nikaltī hai

ai sarāpā-sham.a bazm-e-māh-o-anjum se nikal
kin añdheroñ ko hai terī raushnī darkār dekh

raat kī mahfil-ārā.ī kā pichhle pahar ahvāl na pūchh
sham.a kī lau bhī sard paḌī thī raakh huā parvāna bhī

shab-e-guzishta ke saaz o sāmāñ ke ab kahāñ haiñ nishān baaqī
zabān-e-shama-e-sahar pe hasrat kī rah ga.ī dāstān baaqī

ham ko parvāna o bulbul kī raqābat se ġharaz
gul meñ vo rañg nahīñ sham.a meñ vo nuur nahīñ