Tags-Saya

jaane kis lālach meñ aa kar sar kā saaya bech diyā
meñh meñ bhīge yaad aayā tinkoñ kā chhappar achchhā thā

ye bhī in.ām-e-basīrat hai ki 'shāriq' har dam
saaya ā.īne kī sūrat nazar aatā hai mujhe

allāh kisī shaḳhs ko rusvā na kare yuuñ
mujh se mirā saaya bhī to ab bach ke chale hai

tirā saaya ho jis par us ko hargiz
na aave sāya-e-bāl-e-humā ḳhush

saaya bhī ham-qadam na mirā ho isī liye
ḳhātir meñ laayā maiñ na kisī intibāh ko

koī saaya sā hai chup chaap darīche meñ khaḌā
apnī ulfat kā hī shāyad vo hayūlā hogā

saaya jis kā nazar aatā hai mujhe
vo bhī saaya nazar aatā hai mujhe

ab ishq us maqām pe hai justujū-navard
saaya nahīñ jahāñ koī naqsh-e-qadam nahīñ

na jaane kyā mire allāh hone vaalā hai
muhīb saaya añdhere meñ thartharātā hai

mirā saaya jo mujh se kho gayā thā
kisī din raah chalte mil gayā to

bārhā ThiThkā huuñ ḳhud bhī apnā saaya dekh kar
log bhī katrā.e kyā kyā mujh ko tanhā dekh kar

na koī peḌ na saaya na āhaToñ kā gumāñ
ye justujū kā safar bhī azaab jaisā hai

le aa.ī kis qarya-e-shab meñ ik jhūTe mahtāb kī chaah
saaya saaya bhaTak rahā huuñ be-tanvīr ujāloñ meñ

sunā hai raah meñ hote haiñ sāya-dār shajar
kabhī milūñgā kisī dard-āshnā se maiñ

kis pe ab hai chīnār kā saaya
iiñ jīrānanā-o-kaifal-hāl

har-chand mirā ġham ġham-e-nādīda rahā hai
saaya sā magar ruuh pe larzīda rahā hai

ek sūraj chhup gayā hai aa ke chādar meñ mirī
ek saaya mil gayā hai sā.ebānoñ meñ kahīñ

dil kī bastī pe kisī dard kā saaya bhī nahīñ
aisā vīrānī kā mausam kabhī aayā bhī nahīñ

thā ek saaya sā pīchhe pīchhe jo muḌ ke dekhā to kuchh nahīñ thā
ab apnī sūrat ko dekhtā huuñ kabhī jo sad-paikar-āfrīñ thā

huī hai shaam darīchoñ pe chāñd chamke hai
hai kis kā saaya jo shab bhar sisaktā rahtā hai