Tags-Saya

mausam-e-dīd meñ ik sabz-parī kā saaya
ab gila kyā ki tabī.at to harī rahnā thī

duur tak chhā.e the bādal aur kahīñ saaya na thā
is tarah barsāt kā mausam kabhī aayā na thā

is rāste meñ jab koī saaya na pā.egā
ye āḳhirī daraḳht bahut yaad aa.egā

dīvāna-e-shahrī to dīvār kā saaya le
saa.e meñ muġhīlāñ ke baiThegā ye dīvānā

kyuuñ baam pe āvāzoñ kā dhammāl hai 'ajmal'
is ghar pe to aaseb kā saaya bhī nahīñ hai

maiñ saaya kiye abr ke mānind chalūñgā
ai dost jahāñ tak bhī tirī rāhguzar jaa.e

phal jis pe na the, saaya magar sab ke liye thā
chhitnār shajar ab ke vo āñdhī meñ girā hai

sat.h par aks ko bahtā dekhūñ
dariyā dariyā tirā saaya dekhūñ

nā-tavāñ aisā huuñ pis kar ḳhaak ho jā.ūñ abhī
saaya paḌ jaa.e agar mujh par tirī dīvār kā

ik faqat tere kashīda hone se ye haal hai
bhāgtā hai saaya tak mujh se tirī dīvār kā

pahuñch rahī hai jahāñ tak nigāh saḌkoñ par
na koī peḌ na saaya dikhā.ī detā hai

zamāne se gilā kaisā jab apne jism kā saaya
añdhere meñ hamīñ se duur ho jaa.e to kyā kiije

is soch meñ hī marhala-e-shab guzar gayā
dar vā kiyā to kis liye saaya bikhar gayā

kaisā ajiib vaqt hai koī bhī ham-safar nahīñ
dhuup bhī mo'tabar nahīñ saaya bhī mo'tabar nahīñ

usī fayyāzi kā saaya hai mire lafzoñ par
jis ne baḳhshā hai samarqand o buḳhārā tire naam

vo aur hoñge jo kār-e-havas pe zinda haiñ
maiñ us kī dhuup se saaya badal ke aayā huuñ

kuchh manzil kā ġham baḌh jaatā kuchh rāheñ mushkil ho jātīñ
is taptī dhuup meñ zulfoñ kā saaya na milā achchhā hī huā

ukhḌī ukhḌī sī lagāvaT ko mohabbat na samajh
dhuup chamke to Thahartā nahīñ saaya apnā

tanhā.ī-e-zāt kā saaya hai tanhā.ī apnā virsa hai
ham aaj bhī haiñ tanhā tanhā ham kal bhī tanhā tanhā the

magar charāġh kā saaya abhī vajūd meñ hai
zarūr apne hisāroñ meñ legā nūr-e-dimāġh