Tags-Sawal

vo us ke dil meñ savāl jaisā
mire laboñ pe javāb sā kuchh

us ne javāb meñ kuchh taare girā diye the
maiñ ne āsmāñ ko jab jab koī savāl Daalā

ḳhudā-e-kār-sāz ke karam se 'shād'-ārfī
kabhī mujhe salīqa-e-savāl hī nahīñ rahā

hudūd-e-akl-o-sharb kā savāl hī nahīñ rahā
diloñ meñ ḳhauf-e-rabb-e-zul-jalāl hī nahīñ rahā

har ik javāb kī tah meñ savāl aa.egā
ga.e yugoñ ke butoñ kā zavāl aa.egā

harīf-e-jāñ hai agar vo to phir kaho us se
ga.ī jo jaan to dil kā savāl aa.egā

jitnī hai nadāmat tum ko ab utne hī pashīmāñ ham bhī haiñ
tum us kā javāb hī kyuuñ socho ham se jo savāl nahīñ hotā

bahut dinoñ se yahī ik savāl hai dil meñ
jo maiñ ne sab ko diyā thā vo pyaar kis kā thā

abhī to ham pe purāne hī qarz baaqī haiñ
savāl kar ke na kahiye javāb rahne do

na hī zindagānī kamāl hai na hī maut merā zavāl hai
ki javāb jis kā na mil sakā mire zehn meñ vo savāl hai

jo aayā hijr kā mausam to kyā kareñge ham
jo tajrabe meñ nahīñ vo savāl hai us kā

hazār saal se huuñ tishna-e-savāl-o-javāb
maiñ itnā pyāsā huuñ sonā muhāl hai us kā

us ke aage tū ne phailāyā agar dast-e-savāl
yaad rakh ai dil sulūk-e-mehrbānī phir gayā

havā kuchh apne savāl tahrīr dekhtī hai
ki bādaloñ ko bhī misl-e-zanjīr dekhtī hai

kabhī kabhī to ye dil meñ savāl uThtā hai
ki is judā.ī meñ kyā us ne pā liyā hogā

maiñ un ko is savāl kā ab kyā javāb duuñ
dāman ko āstīñ ko garebāñ ko kyā huā

yuuñ bhī hazāroñ lākhoñ meñ tum intiḳhāb ho
puurā karo savāl to phir lā-javāb ho

maiñ ne bhī chalte chalte yūñhī kar diyā savāl
kyā ho gayā jo aap ne puurā nahīñ kiyā

dariyā-e-tund-mauj ko sahrā batā.iye
sīdhā bhī ho savāl to ulTā batā.iye

hai rañg rañg magar āftāb ā.īna
jabīn-e-shab pe to likkhe savāl kaale the