Tags-Sawal

saḌak pe baiThe hue qalandar ke sar paḌe haiñ savāl kitne
zamāna us se jo pūchhtā hai vo us ne mujh ko batā diyā hai

jab thī badlī huī nazar un kī
phir savāl-o-javāb kyā karte

tez havā uḌā chale jis tarah barg-e-zard ko
us kī hañsī bhī apne saath merā savāl le ga.ī

mirā savāl koī aam sā savāl nahīñ
mirā savāl tirī baat kā javāb bhī hai

koī muamma kabhī is tarah bhī ho maulā
savāl merī taraf huuñ javāb us kī taraf

kaaT āgāhiyoñ kī fasl magar
zehan meñ kuchh na.e savāl ugā

kyā zikr un se kījiye dil ke malāl kā
hai ḳhāmushī javāb mire har savāl kā

mujhe kyā ġharaz mire dushmanoñ kā hadaf hai kyā
mire paas kaun sī Dhaal hai ye savāl hai

na.e ahd kī ye taraqqīyāñ ye tajalliyāñ
koī is meñ merā kamāl hai ye savāl hai

ye jo sar pe mere vabāl hai ye savāl hai
ye jo gird-o-pesh kā haal hai ye savāl hai

koī hai jo mujh sā aziim ho jo fahīm ho
ye savāl koī savāl hai ye savāl hai

ye jo rabt rū-ba-zavāl hai ye savāl hai
mujhe is kā kitnā malāl hai ye savāl hai

mirā maazī kitnā amiir thā maiñ ġharīb huuñ
koī ye bhī māzī-o-hāl hai ye savāl hai

kisī ko dekhūñ to māthe pe māh-o-sāl mileñ
kahīñ bikhartī huī dhuul meñ savāl mileñ

mire haath shal mire paañv shal mirī aql gum
koī aur itnā niDhāl hai ye savāl hai

mire saare ḳhvāb haiñ mo'tabar maiñ huuñ dar-ba-dar
ye uruuj hai ki zavāl hai ye savāl hai

vo sadā na thī vo to jazb thā vo to ishq thā
mirī saf meñ koī bilāl hai ye savāl hai

aao ki aaj ġhaur kareñ is savāl par
dekhe the ham ne jo vo hasīñ ḳhvāb kyā hue

savāl kyā ho ki un kī ḳhamosh nazroñ meñ
na de sake jo vo ab tak vahī javāb na ho

āñkhoñ se savāl paḌh rahī thī
palkoñ se javāb likh rahī thī