Tags-Rahbar

nahīñ ye fikr koī rahbar-e-kāmil nahīñ miltā
koī duniyā meñ mānūs-e-mizāj-e-dil nahīñ miltā

ham apne rahzan o rahbar the lekin sāda-lauhī se
kisī ko rāhzan samjhe kisī ko rāhbar jaanā

burā ho rashk kā rahbar samajh kar dil se jo pūchhā
adam kā rāsta batlā diyā gum-gashta-rāhī ko

dil ko āñkhoñ ne sujhā.ī haiñ jo rāheñ ishq kī
har jagah mujh ko liye phirtā hai rahbar kī tarah

shauq-e-dil fikr-e-dahan meñ hai jo rahbar kī tarah
DhūñDhtā huuñ chashma-e-haivāñ sikandar kī tarah

maiñ rāsta bhūlā huā pyāda huuñ mujhe kyā
rahbar ko agar jāda-e-barbād kī zid hai

har ek moḌ se pūchhā hai manziloñ kā pata
safar tamām huā rahbar nahīñ aa.e

dasht-e-rusvā.ī hī bantā hai muqaddar us kā
ishq jis jis kā bhī rahbar nahīñ hotā yaksar

un ke dar tak jo pahuñch jaa.e vahī ābla-pā
rahbar-e-qāfilā-e-jāñ hai ye ma.alūm huā

qāfile vāloñ ke is sabr-o-tahammul ko salām
koī āsān hai rahzan ko bhī rahbar kahnā

kaun rahbar ho ishq kī rah meñ
aap hī apne rahnumā haiñ ham

tārīf-e-husn-e-yār ne is ko kyā raqīb
rahbar bhī beach raste meñ ham se badal gayā

mujh ko hai faḳhr ki us qaum se nisbat hai mirī
fātima mariyam-o-sītā sī haiñ rahbar jis kī

batānā hai mushkil chhupānā hai mushkil
kareñ kyā o rahbar nasīhat hī diije

har ik saa.e ke pīchhe bhāgte haiñ
kaho apnā bhī rahbar hai nahīñ hai

nahīñ maslahat ki rahbar koī baat sach batā de
zarā kārvāñ se pūchho jo shikast jo thakan hai

vaa.iz ne bhare ḳham chuur kiye tar kar dī zamīñ ai pīr-e-muġhāñ
zālim ne zarā bhī terā lihāz ai rahbar-e-īmāñ kuchh na kiyā

na rahbar ne na us kī rahbarī ne
mujhe manzil atā kī gumrahī ne

jo sahrā hai use kaise samundar likh diyā jaa.e
ġhazal meñ kis tarah rahzan ko rahbar likh diyā jaa.e

ai rahbar-e-manzil tirī raftār ke sadqe
ai mehr-e-munavvar tire anvār ke sadqe